Ing Pamaghiganti
Neng Renato B. Alzadon
Tinipa la patag dening taga-bunduk
Karas da king baryu atmo pali buntuk;
Mipabaluan tamung tanak na at subuk
Ipaghiganti re ing mal tang pamuntuk!
Agpang mo karela ala lang kabaluan
King pangawala na ning Kapitan Roldan;
Ngara karing anggang taung menungkulan,
Ing Kapitan ayni yang dapat luguran.
Ngara pa karas king ugali at dapat
Ing Kapitan Roldan ala yang katapat;
Ing lugud na king Dios malabab at tapat,
Nung mangamanu ya, atmu pangasampat.
Nya ngara nung nu re diklut pepasaken
Ken tala tambangan at gisanan paten;
King barang tangalan ding maldang memalen
Daramdaman taya ing aklis ning Balen.
Byernis gatpanapun king bayung Eskuela
Y koronel Gumban biglang dinatang ya;
Ding tau king baryu pepayaus nala
Atin yapin kanung mensaji karela.
Ngana ning Koronel: labis kung kelungkut
Ing kapitan Roldan kabud da nya dimput;
Ding guinawa kanian dapat lang mabagut
Panintunan mila nula man salikut.
Kening depatan da ding taung marawak
Antimong aku nang karelang inakdak;
Pablasang daya ke bilang kamag-anak
Ing Kapitan Roldan anti ke mong anak.
Detang paka-patig kalako da kanian
Bulung-bulung tamu at milalawayan;
Balu tang mausta aldo lang panayan
Mamaksing king baryu ing matning labanan.
At misan a aldo miglapitpit lapin
AK 47, automatic carbin.
Miglagapak la ding Armalite M 16.
Pakasakab-dukmu tamung alang sapin.
Mikit ing akbungan, mikit ing panagkas
At alang patugut ing syuk da ding balas;
Ing balang lapitpit agad atin ablas
Mate na nung mate alang bisang matras.
Karing anggang laban a tengalan tana
Ing labanan ayni maka-aliwa ya;
Uling balang panig ing atyu king lub da
Ing pamaghiganti king parsalaman da.
Keng lub da ding kilual pete re ding PC
Keng lub da ding PC Hukbu lang dinali;
Ngening ing tutu na metung man kareti
Alang makibalu king tutung milyari.
Era naman balu nung tutung mete ne
Guewa reng sandalan ipagjiganti re;
Ing pamaghiganti dakal ya a pate
Pati ding memaryung epa batu bale.
Ing labanan aini maguing aral ya sa
Lalu na karetang tatalan sandata;
Ing pamahiganti a bunga na ning mua
Bubulagan nala ding matang masala.
Ing kapitan Roldan pilming ena buri
Ing e biru-birung dayang tinulari
Uling king dayang yan ing makipasari
Ing ke-alan isip a pamaghiganti.
********************************
roldan,1978/revised 05
Saturday, April 28, 2007
Pamagbalik
Pamagbalik
Neng: Renato B. Alzadon
Ugtung aldo tapat---tajimik king baryu
Ala kang damdaman inge agyang nanu;
Atilu ngan ata king bale deng tau,
Kilung do ngan ata king bale deng asu!
King katajimikan kabud na memaltuk
Tikian ning lagapak at matning lagutuk!
Mikit ing akbungan! Balas la ding sisyuk---!
Pakasakab tamung makasubsub buntuk.
Eta mu bubulad. Eta mu sasabi,
Agyang balu tana nung nanung milyari.
Makasane tana king anti kanini:
Milaban no naman ding Hukbu at PC.
Penapenandit mu ing tangking kukurug
Ya ing lito-lito king gabun durugdug;
Kabang lilibut yang mamamalipugpug
Anti lang bebewan ding salu tang kakdug.
Biglang menahimik. Tinuknang ing akbung.
Dinayu ne itang tangking daragundung;
Kanian ya maramdam ing matning galeung!!!
Ketang bale galut, manangis ya’y Bilyung.
Meki-iglo tamung alang pamikunut.
Kaibat ning akbungan, ala tanang takut.
Ing tengalan tamu makapangilabut---!!!
Mebaril ya rugu atyan ing mabuktut.
Libu syam a ralan pitung pulu’t lima
Iniang mapalyari ing trajedyang ita.
Kaibat nang milibing ning kayang asawa.
Y Bilyung, king baryu ene linto lupa.
Ngara ding aliwa minta ya king Cebu,
Ding aliwa naman, king Palawan kanu.
Menga-alilan no dening gugubyernu
Bitasang aliya siniput king baryu.
Kaibat ning panaun ning pamanahimik
Mibalik no naman ding tropang mabagsik;
Itang kaselanan kabud na migbalik;
King pamagbalik na, mataram ya pitik.
Banda king Pangulu atmu na kagulu
Dakal no na naman pamaten dang tau.
Lalto makalunus itang Ortelanu
E ta makatanam pale ampon atbu.
E ta pa mibawi king pamagkasakit
Magbalik na naman ing pamamalipit.
Ala tang keliwan karing makasipit
Pilatan ding aduang batung mipamitpit.
Ngara ding makatua---detang mekatanda
Ketang panaun na ning salwakan daya:
"O'bat kaya rugo e tana sinawa
King pane patayan at pamanganyaya."
"Oyan, ing patayan mengari yang bagyu
Papunta ya keni king kekatang baryu;
Magdatun no naman king bale deng tau,
Magkulung no naman king bale deng asu."
At misan a aldo kabud na memaltuk!
Milaban no naman ding PC at ding Huk;
Ba'tang mipanginlag king balas a sisyuk
Pakasakab tamung pakasubsub buntuk.
Ati ne na naman ing Tangking kakarag
Anti yang manintun bale pamaliswag;
Anggang e dinayu ali ya mepagpag
Ing sindak king lub da ding salung kakabag!
Penapenadit mu ala nang akbungan
Ala tamung takut linague king dalan;
Buri tang abalu nung ninu la’t pilan
Ding miragsang mete king pamibarilan.
Karetang miragsa keni king padulung,
Kabud tana atin akilalang metung;
Inia pala keni marakal ing akbung
Tidtaran deng balas Y KUMANDER BILYUNG---!!!
++++++++++++++++++++++++++++++++++++++
Neng: Renato B. Alzadon
Ugtung aldo tapat---tajimik king baryu
Ala kang damdaman inge agyang nanu;
Atilu ngan ata king bale deng tau,
Kilung do ngan ata king bale deng asu!
King katajimikan kabud na memaltuk
Tikian ning lagapak at matning lagutuk!
Mikit ing akbungan! Balas la ding sisyuk---!
Pakasakab tamung makasubsub buntuk.
Eta mu bubulad. Eta mu sasabi,
Agyang balu tana nung nanung milyari.
Makasane tana king anti kanini:
Milaban no naman ding Hukbu at PC.
Penapenandit mu ing tangking kukurug
Ya ing lito-lito king gabun durugdug;
Kabang lilibut yang mamamalipugpug
Anti lang bebewan ding salu tang kakdug.
Biglang menahimik. Tinuknang ing akbung.
Dinayu ne itang tangking daragundung;
Kanian ya maramdam ing matning galeung!!!
Ketang bale galut, manangis ya’y Bilyung.
Meki-iglo tamung alang pamikunut.
Kaibat ning akbungan, ala tanang takut.
Ing tengalan tamu makapangilabut---!!!
Mebaril ya rugu atyan ing mabuktut.
Libu syam a ralan pitung pulu’t lima
Iniang mapalyari ing trajedyang ita.
Kaibat nang milibing ning kayang asawa.
Y Bilyung, king baryu ene linto lupa.
Ngara ding aliwa minta ya king Cebu,
Ding aliwa naman, king Palawan kanu.
Menga-alilan no dening gugubyernu
Bitasang aliya siniput king baryu.
Kaibat ning panaun ning pamanahimik
Mibalik no naman ding tropang mabagsik;
Itang kaselanan kabud na migbalik;
King pamagbalik na, mataram ya pitik.
Banda king Pangulu atmu na kagulu
Dakal no na naman pamaten dang tau.
Lalto makalunus itang Ortelanu
E ta makatanam pale ampon atbu.
E ta pa mibawi king pamagkasakit
Magbalik na naman ing pamamalipit.
Ala tang keliwan karing makasipit
Pilatan ding aduang batung mipamitpit.
Ngara ding makatua---detang mekatanda
Ketang panaun na ning salwakan daya:
"O'bat kaya rugo e tana sinawa
King pane patayan at pamanganyaya."
"Oyan, ing patayan mengari yang bagyu
Papunta ya keni king kekatang baryu;
Magdatun no naman king bale deng tau,
Magkulung no naman king bale deng asu."
At misan a aldo kabud na memaltuk!
Milaban no naman ding PC at ding Huk;
Ba'tang mipanginlag king balas a sisyuk
Pakasakab tamung pakasubsub buntuk.
Ati ne na naman ing Tangking kakarag
Anti yang manintun bale pamaliswag;
Anggang e dinayu ali ya mepagpag
Ing sindak king lub da ding salung kakabag!
Penapenadit mu ala nang akbungan
Ala tamung takut linague king dalan;
Buri tang abalu nung ninu la’t pilan
Ding miragsang mete king pamibarilan.
Karetang miragsa keni king padulung,
Kabud tana atin akilalang metung;
Inia pala keni marakal ing akbung
Tidtaran deng balas Y KUMANDER BILYUNG---!!!
++++++++++++++++++++++++++++++++++++++
Ortelano, Mekakeni...!
Ortelano, Mekakeni...!
Neng Renato B. Alzadon
Ortelano, mekakeni, king silangan, batyawan me
ing pagmulan ning kabyayan, ing malapad a marangle;
at king tagle dang sikanan ding mayupaya mung takde
buri ku sa ilinlin mu ing dikut nang mangulabe;
at ketang kabubuslan na, ing sibul na, gisingan me
ban keta ing keyang danum magus yang pakakalale.
Potang mamasa-masa ne ing gabun ketang sibul na,
e ka sana pate-pate, ing sipag mu palto mu na;
ing sudsud ning kekang sarul bustan mung pamaligtad na
itang gabun a melayo a king lingun manenaya,
at nung sasarul ka mu rin ing lub mu ibugnus mu na
e itang sarul kang ditak, kaibat, dakal ing paynawa.
Yang byasa keng pamanyarul abistu meng agad-agad
king takbang nang makarima, makasunis, makasukad;
itang eya mamirapal dapot ene man banayad
atyu ya king kasantingan itang kayang pamanlakad,
inya agyang malambatan ing sarulan e sasayad
uling balu nang timtiman nung nukarin ya misadsad.
Yan namang e byasang sarul, kimut na pabisu-bisu
anti yang makitagalan, ala nemang kasaglulu;
inia potang makatangtang ing sarulan, kabud nemu
sunga-sunga king kapagal, bisang magpainawa pamu;
makanano malata ne karing pawas nang tinulu
uling ing pamanyarul na, masagwang pasakdu-sakdu.
Yang gabun balu na naman nung ustu ya panga-obra
kaibat na ning pamanyarul atme kamu yang lupa na,
akit mu itang sepuling pante-pante, pila-pila...
nanan me ta yang poesiang atmu santing pangalala,
yan mang gabun nung ustu ya pangagalo, magana ya
at yang bining mipunla ken dagul at mataba bunga.
Kaibat na ning pamanyarul, ita, e na buring sabian
ing muli ka king kubu mu ban matudtud kang maniaman;
yang biasa keng pamanasik ene lakwan ing asikan
at manintun ya pang bague a sukat na sanang daptan;
nung atin man tagubana panikuanan nong atakpan
ban ing danum naning sibul e miyugse, matipun ngan.
Potang mitakap ing silim, at ing gabun paynawa ne
ikaman paynawa na ka at muli king kekang bale;
dapot kabuklat ning abak, gayak ka, at agad lague
ban keta ikang mangising king matudtud a marangle,
ing sepuling makababad kaba ning palambutan me
mamalimping ka't magdaras, karin pilapil manyable.
Oyan, Budning Ortelano, nung masipag ka, keka ya
ing malwalas a asikan ning tagumpe at ligaya;
dapot nung angga kamu keng sarul ditak at paynawa
ena ka pa mu dudulung, king aliwa na ka munta;
ngeni nung king pamanasik makisipagan kang dala
oini, ing kanakung gabon, mekakeni, sarul na ka!
**************************************
Neng Renato B. Alzadon
Ortelano, mekakeni, king silangan, batyawan me
ing pagmulan ning kabyayan, ing malapad a marangle;
at king tagle dang sikanan ding mayupaya mung takde
buri ku sa ilinlin mu ing dikut nang mangulabe;
at ketang kabubuslan na, ing sibul na, gisingan me
ban keta ing keyang danum magus yang pakakalale.
Potang mamasa-masa ne ing gabun ketang sibul na,
e ka sana pate-pate, ing sipag mu palto mu na;
ing sudsud ning kekang sarul bustan mung pamaligtad na
itang gabun a melayo a king lingun manenaya,
at nung sasarul ka mu rin ing lub mu ibugnus mu na
e itang sarul kang ditak, kaibat, dakal ing paynawa.
Yang byasa keng pamanyarul abistu meng agad-agad
king takbang nang makarima, makasunis, makasukad;
itang eya mamirapal dapot ene man banayad
atyu ya king kasantingan itang kayang pamanlakad,
inya agyang malambatan ing sarulan e sasayad
uling balu nang timtiman nung nukarin ya misadsad.
Yan namang e byasang sarul, kimut na pabisu-bisu
anti yang makitagalan, ala nemang kasaglulu;
inia potang makatangtang ing sarulan, kabud nemu
sunga-sunga king kapagal, bisang magpainawa pamu;
makanano malata ne karing pawas nang tinulu
uling ing pamanyarul na, masagwang pasakdu-sakdu.
Yang gabun balu na naman nung ustu ya panga-obra
kaibat na ning pamanyarul atme kamu yang lupa na,
akit mu itang sepuling pante-pante, pila-pila...
nanan me ta yang poesiang atmu santing pangalala,
yan mang gabun nung ustu ya pangagalo, magana ya
at yang bining mipunla ken dagul at mataba bunga.
Kaibat na ning pamanyarul, ita, e na buring sabian
ing muli ka king kubu mu ban matudtud kang maniaman;
yang biasa keng pamanasik ene lakwan ing asikan
at manintun ya pang bague a sukat na sanang daptan;
nung atin man tagubana panikuanan nong atakpan
ban ing danum naning sibul e miyugse, matipun ngan.
Potang mitakap ing silim, at ing gabun paynawa ne
ikaman paynawa na ka at muli king kekang bale;
dapot kabuklat ning abak, gayak ka, at agad lague
ban keta ikang mangising king matudtud a marangle,
ing sepuling makababad kaba ning palambutan me
mamalimping ka't magdaras, karin pilapil manyable.
Oyan, Budning Ortelano, nung masipag ka, keka ya
ing malwalas a asikan ning tagumpe at ligaya;
dapot nung angga kamu keng sarul ditak at paynawa
ena ka pa mu dudulung, king aliwa na ka munta;
ngeni nung king pamanasik makisipagan kang dala
oini, ing kanakung gabon, mekakeni, sarul na ka!
**************************************
Sunday, April 1, 2007
Ninu Ing Migtaksil
Neng Renato B. Alzadon
Ing amanung kapampangan, nung metung ya sanang bansa
Mamit-amit neng mikuldas ing maningning nang bandera;
Uling insamang linusub kabud iti migwagui ya
Yang mumuna nang ibaba ing bandera ning simbut na;
Inya sa't ing kapampangan nung mesambut neng talaga
Ing bandera ning sinambut ya naman ing iladlad na.
Mupin, insanung bandera ing panalili dang ike...?
Ngening atlu la ding Osong agnan-agnan sinalake...!
King buntuk na, ing Tagalug alang tuknang pangetan ne
King bitis na, Ilukanu lang ngangatngat alang inge;
Keta namang bandang atyan English ya ing makasake
Ing amanung panginisan makanian yang mamamate.
Ngara detang mausisa: Bakit kaya mipakanian?
E wari mangatapang la dening lahing kapampangan?
Balakusang king uyat da mamagus, manaluntunan
Ing daya ra ding bayani..., dayang sugui..., dayang Lakan?
Bat inyang ing amanu ra lisuban deng sisintangan
Nukarin la ding sundalus, O'bat ela mekilaban...?
Linaban la ding sundalus! O' wa, linaban lang tutu
Ing historia patutuan na, linaban lang e bibiru;
Tinikdo ya Y Gallardo, Y Ocampo, at ding sugu
Tinalad la king labanan binie ra ing sablang kagyu;
Angga king tauli nang patak ning paniulat dang megipu
Ding sundalus ning amanu bitasang ela sinuku.
Nung makanian a ding watas tinalad lang mekibangga
Bat ing amanu rang sisuan mapapatad ya inawa?
Makanano, ding memalen na ning Tarlac at Pampanga
Ila ding mismung kinawang at pepaingulut karela;
Inya balang metung karen marapat mu ing kutnan la
Ika...,ika Kapampangan, ing pusu mu nukarin ya?
Nukarin ya ing pusu mu? Bakit alika melunus
King sarili mung salitang akakit mung managipus?
Nukarin ya ing pusu mu? Bakit sikwil meng tibubus
Ing kultura ning balen mung king kau na mamayuspus?
Nukarin ya ing pusu mu? Bakit tikusan mong lubus
Ding kawal na ning amanung akakit mung mangatampus?
Inya, oyan! Lon me, Oyan! king kapalaran nang ingsil
Ning amanu ning balen mung king kutkutan makagitil...!
Ika..., ika..., Kapampangan ing king tungkul e dinikil
Ika mismung migpabusta....ika mismung linto sawil;
Karing kawal ning amanu, ika, ika ing misakwil....
Ika..., Ika Kapampangan..., ikang minunang migtaksil!
Ika..., ing anting patutut matulang mekilaguyo
karing dayuan a dios-diosan simban mung anting idolo.
Ika..,ika ing mewili king gayut dang makailo
Meguing supaping mekiapus king pangimut da at galo;
Ika.., ikang migpiak mata karing sundalus mung sasyo
King marangle ning labanan maniambitan at papiglo.
Nung ninu napin mang lasip king amanu mu lalapak
Yanapin mang pupurian mung sasalabungan palakpak;
Nung ninu napin mang salut king salita mu maglasak
Yanapin mang kakaulan mu at palsintan mung mataktak;
Dapot karing poeta mung mekipaglaban king pisak
Bitasang emu sikasu ing tangis da at gulisak.
Nung ating bansang matatag keting yatung maleparan
Ila ding ating sundalus a tatalad king labanan;
Yang bansang alang masabal karing kawal ning balayan
E malyaring managumpe..., e mitikdo kapilan man;
Makanian ya ing amanu, e managumpe at minuan
Nung ding sundalus nang watas mipabustan lang makanian.
Inia oyan Kapampangan, oyan ing maplas nang kalma
Ning amanu ning balen mung maghingalu nang mistula;
Nung karing kekang sundalus eka mosa migpabaya
Malaut yang mipakanian ing sarili mung salita;
Ah! Emu ne kikiakan pa, sayang na mu ing kekang lua....
Ing historia ya ing matul.....ika, ikang migpabusta!
********************************************
Ing amanung kapampangan, nung metung ya sanang bansa
Mamit-amit neng mikuldas ing maningning nang bandera;
Uling insamang linusub kabud iti migwagui ya
Yang mumuna nang ibaba ing bandera ning simbut na;
Inya sa't ing kapampangan nung mesambut neng talaga
Ing bandera ning sinambut ya naman ing iladlad na.
Mupin, insanung bandera ing panalili dang ike...?
Ngening atlu la ding Osong agnan-agnan sinalake...!
King buntuk na, ing Tagalug alang tuknang pangetan ne
King bitis na, Ilukanu lang ngangatngat alang inge;
Keta namang bandang atyan English ya ing makasake
Ing amanung panginisan makanian yang mamamate.
Ngara detang mausisa: Bakit kaya mipakanian?
E wari mangatapang la dening lahing kapampangan?
Balakusang king uyat da mamagus, manaluntunan
Ing daya ra ding bayani..., dayang sugui..., dayang Lakan?
Bat inyang ing amanu ra lisuban deng sisintangan
Nukarin la ding sundalus, O'bat ela mekilaban...?
Linaban la ding sundalus! O' wa, linaban lang tutu
Ing historia patutuan na, linaban lang e bibiru;
Tinikdo ya Y Gallardo, Y Ocampo, at ding sugu
Tinalad la king labanan binie ra ing sablang kagyu;
Angga king tauli nang patak ning paniulat dang megipu
Ding sundalus ning amanu bitasang ela sinuku.
Nung makanian a ding watas tinalad lang mekibangga
Bat ing amanu rang sisuan mapapatad ya inawa?
Makanano, ding memalen na ning Tarlac at Pampanga
Ila ding mismung kinawang at pepaingulut karela;
Inya balang metung karen marapat mu ing kutnan la
Ika...,ika Kapampangan, ing pusu mu nukarin ya?
Nukarin ya ing pusu mu? Bakit alika melunus
King sarili mung salitang akakit mung managipus?
Nukarin ya ing pusu mu? Bakit sikwil meng tibubus
Ing kultura ning balen mung king kau na mamayuspus?
Nukarin ya ing pusu mu? Bakit tikusan mong lubus
Ding kawal na ning amanung akakit mung mangatampus?
Inya, oyan! Lon me, Oyan! king kapalaran nang ingsil
Ning amanu ning balen mung king kutkutan makagitil...!
Ika..., ika..., Kapampangan ing king tungkul e dinikil
Ika mismung migpabusta....ika mismung linto sawil;
Karing kawal ning amanu, ika, ika ing misakwil....
Ika..., Ika Kapampangan..., ikang minunang migtaksil!
Ika..., ing anting patutut matulang mekilaguyo
karing dayuan a dios-diosan simban mung anting idolo.
Ika..,ika ing mewili king gayut dang makailo
Meguing supaping mekiapus king pangimut da at galo;
Ika.., ikang migpiak mata karing sundalus mung sasyo
King marangle ning labanan maniambitan at papiglo.
Nung ninu napin mang lasip king amanu mu lalapak
Yanapin mang pupurian mung sasalabungan palakpak;
Nung ninu napin mang salut king salita mu maglasak
Yanapin mang kakaulan mu at palsintan mung mataktak;
Dapot karing poeta mung mekipaglaban king pisak
Bitasang emu sikasu ing tangis da at gulisak.
Nung ating bansang matatag keting yatung maleparan
Ila ding ating sundalus a tatalad king labanan;
Yang bansang alang masabal karing kawal ning balayan
E malyaring managumpe..., e mitikdo kapilan man;
Makanian ya ing amanu, e managumpe at minuan
Nung ding sundalus nang watas mipabustan lang makanian.
Inia oyan Kapampangan, oyan ing maplas nang kalma
Ning amanu ning balen mung maghingalu nang mistula;
Nung karing kekang sundalus eka mosa migpabaya
Malaut yang mipakanian ing sarili mung salita;
Ah! Emu ne kikiakan pa, sayang na mu ing kekang lua....
Ing historia ya ing matul.....ika, ikang migpabusta!
********************************************
Nanung Sabian ku Karela
Neng Renato B. Alzadon
Ketang Bale- Matua.
Ing Ingkung mag-istoria ya king anak na.
Keta kanung kapanaunan na
kayabe de di Hilario, Mercado, at aliwa pa
at pepalabung de ing amanung mana
karing kawatasan a sinulat da.
Ketang Bale-Kubu king lawta
Ing Tatang naman yang mag-istoria.
Keta kanung panaun na
kayabe de di Yuson, Reyes, Yumul, at aliwa pa
at pepalabung de ing amanung sinta
karing mangalambing a kawatasan da.
Ketang Restaurante Panera
Ing Apu naman ing mag-istoria.
Ketang kapanaunan na
Kayabe re di Maniago, Pena, at Turla
ban saguipan de ing amanung mana
karing kawatasan a gagawan da..
Ing apu king tud linawe ne Y Tatang na
O' yaku nanu neman ing dake ku, ngana.
Ninu pang akayabe kung poeta
nung ala nang kapampangan pa?
At nung miras ing panaun aku naman mag-istoria
nanung sabian ku karela?
01**************RBA********************06
Ketang Bale- Matua.
Ing Ingkung mag-istoria ya king anak na.
Keta kanung kapanaunan na
kayabe de di Hilario, Mercado, at aliwa pa
at pepalabung de ing amanung mana
karing kawatasan a sinulat da.
Ketang Bale-Kubu king lawta
Ing Tatang naman yang mag-istoria.
Keta kanung panaun na
kayabe de di Yuson, Reyes, Yumul, at aliwa pa
at pepalabung de ing amanung sinta
karing mangalambing a kawatasan da.
Ketang Restaurante Panera
Ing Apu naman ing mag-istoria.
Ketang kapanaunan na
Kayabe re di Maniago, Pena, at Turla
ban saguipan de ing amanung mana
karing kawatasan a gagawan da..
Ing apu king tud linawe ne Y Tatang na
O' yaku nanu neman ing dake ku, ngana.
Ninu pang akayabe kung poeta
nung ala nang kapampangan pa?
At nung miras ing panaun aku naman mag-istoria
nanung sabian ku karela?
01**************RBA********************06
Nanung Sabian ku Karela
Neng Renato B. Alzadon
Ketang Bale- Matua.
Ing Ingkung mag-istoria ya king anak na.
Keta kanung kapanaunan na
kayabe de di Hilario, Mercado, at aliwa pa
at pepalabung de ing amanung mana
karing kawatasan a sinulat da.
Ketang Bale-Kubu king lawta
Ing Tatang naman yang mag-istoria.
Keta kanung panaun na
kayabe de di Yuson, Reyes, Yumul, at aliwa pa
at pepalabung de ing amanung sinta
karing mangalambing a kawatasan da.
Ketang Restaurante Panera
Ing Apu naman ing mag-istoria.
Ketang kapanaunan na
Kayabe re di Maniago, Pena, at Turla
ban saguipan de ing amanung mana
karing kawatasan a gagawan da..
Ing apu king tud linawe ne Y Tatang na
O' yaku nanu neman ing dake ku, ngana.
Ninu pang akayabe kung poeta
nung ala nang kapampangan pa?
At nung miras ing panaun aku naman mag-istoria
nanung sabian ku karela?
01**************RBA********************06
Ketang Bale- Matua.
Ing Ingkung mag-istoria ya king anak na.
Keta kanung kapanaunan na
kayabe de di Hilario, Mercado, at aliwa pa
at pepalabung de ing amanung mana
karing kawatasan a sinulat da.
Ketang Bale-Kubu king lawta
Ing Tatang naman yang mag-istoria.
Keta kanung panaun na
kayabe de di Yuson, Reyes, Yumul, at aliwa pa
at pepalabung de ing amanung sinta
karing mangalambing a kawatasan da.
Ketang Restaurante Panera
Ing Apu naman ing mag-istoria.
Ketang kapanaunan na
Kayabe re di Maniago, Pena, at Turla
ban saguipan de ing amanung mana
karing kawatasan a gagawan da..
Ing apu king tud linawe ne Y Tatang na
O' yaku nanu neman ing dake ku, ngana.
Ninu pang akayabe kung poeta
nung ala nang kapampangan pa?
At nung miras ing panaun aku naman mag-istoria
nanung sabian ku karela?
01**************RBA********************06
Nanu Ya Ing Tau
Neng Renato B. Alzadon
Nanu ya ing tau. Ing tau nanu ya?
Paki-intindyan ke king gagkas ding biasa.
Ngara ding pantas king pamanialpantaya
INAWA NE NING BIE lebul nang Jehova;
Agpang karing magkas king Pilosopiya
BAGUE yang MIMISIP--- LAMAN at DIWA ya;
Ding Darwinian naman matning sasabian da
Metung yang ANIMAL n'ya mapaniupil ya.
Ing kapaniupilan king kaparang Mortal
Yang palatandanan ning taung animal;
Ume yang maniupil ampon makipagkal
King baneng iwalak makitid nang lugal,
karing ayapsal na akit meng manapsal,
karing asakal na akit meng manyakal
Ban ding kayang supil tunggen deng makamal
Leon ya king gubat, guinu yang matangal.
Karing bilungan ning libru ning Istoria:
Mika Darius ya ing Matuang Babilonia,
Mika Alexander ya ing Macedonia,
Mika Julio Cesar king Paganong Roma,
Mika Napoleon Bonapart king Francia,
Mika Adolph Hitler ya ing Alemania.
At aliwa muren nune dakal la pa
Ding linub miniupil kasiping dang bansa.
Agpang naman karing budning Pilosopo,
BAGUE yang MIMISIP matas ya talindo;
Pagnasan neng akit ing aslag ning aldo
Ban lakuan ne dulum ing Kweba nang Plato;
Inia makanian yang minisip matilo
Eya pepatugut king pamanimbento
King anggang paniulung a ngeni makalto
Ing PAMISIP naning tau yang pepalto.
Mika pamanyulung king parang ning syensya
Makapagmulala ne ing teknoloya;
Misusulapo ne ing tau king banua
Darasan na pati aliwang planeta;
Ing lijim ning dagat ene lijim kaya;
Ing bie na ning yatu atyu king gamat na.
Wari sa king libru na ning Pilosopya
Ikit ne ing sala, ala ne king Kweba.
Ngara naman detang magkas king reliyon
Ing tau eya mu pamisip at aksyon;
Atin yang kaladuang makipag-komunyon
King Matas a IBPAng babie inspirasyon.
Inia kabang bie na ing mal nang debosyon
Ing tajiran no ding bayung jenerasyon;
Makalaman karing kayang meditasyon
Ing katuparan na ning Banal nang Misyon.
Ding linto uliran: Moses ding Hebreo
Ing bait Bethlehem, Jesus Nazareno;
San Pablo,San Pedro, Helen, Constantino
Ing Madre Teresa, at Papa Juan Pablo;
Propeta Muhamad ding Muslim o Moro
Siddarta Gautama ning turung Budismo;
King India, Mahatma; king dayang Malayo,
Doctor Jose Rizal at Ninoy Aquino.
Nung pitutuliran ing gagkas ding biasa
Lalto king ing tau atlu ya persona;
Ing kapaniupilan inia gagawan na
Personang animal yang magbabo kaya.
Inia e patugut pasulung keng syensya,
Personang mimisip ya ing paganan na.
Nung inya ing tau lusuk at sakdal ya,
Persona yang Angjel ing tataid kaya.
Aku man, nung misan, animal ku naman
Ding para kung lasip buri kong supilan;
Ibat king anak ku yang akaugalian
Maki-pagtorneo kareng pasiknangan;
Ing pamagsane ku e makanian-kanian
King bakung maniambut karas ning labanan
Ing pulung-arena buri keng sakupan
Maguing aring leon, kampyon dang tangalan.
At nung misan naman metung kung makudta
Sisibul king isip ing malagung diwa;
Tipunan ko detang mapinung salita
Saka ko ilala at piakma-akma;
Potang mayari ne ing kanakung guewa,
Poesia yang lunto yampang karing malda;
At ing poesiang yan yang magsilbiing tanda
King atin minisip king mayubung paksa.
At nung misan naman tapat keng susuyu
Dimut kung kaguiwan king banal nang lagyu
At panamdamn ning mabilug kung pusu
Malapit ku Kaya, anak nakung bungsu;
Nung paten daku man king krus da ipaku
Ali ku pa-alian nung nanu ing tutu:
Atin Dios! Atin Dios! Ing Dios yang mituru
Baku lang palsintan ding kalupang bigu.
Nung misan, king ubud ning kapanamdaman
Mipagkal-pagkal la ding atlung sikanan;
Ing personang lasip manintun yang laman;
Ing personang angjel babawal na neman;
Ing personang anghel buri na mayap ngan;
Ing personang lasip liliku yang dalan.
Ing personang isip ya ing manimbangan
Potang manatul ya, pikamuan da ne man.
Ing tau nanu ya? Ibat king anak ku
Paki-intidian ke king pisni ding libru;
Pikutang-kutang ku nung ninu ta aku,
Pati siping bale pagugumasdan ku.
Dapot angga ngening pilak na ing buak ku
Menatili ya ring metung a misteryu .
Bugtung ya mo waring luruk-lurukan ku.
Ing tau nanu ya? NANU ya ing Tau.
*******************************
Nanu ya ing tau. Ing tau nanu ya?
Paki-intindyan ke king gagkas ding biasa.
Ngara ding pantas king pamanialpantaya
INAWA NE NING BIE lebul nang Jehova;
Agpang karing magkas king Pilosopiya
BAGUE yang MIMISIP--- LAMAN at DIWA ya;
Ding Darwinian naman matning sasabian da
Metung yang ANIMAL n'ya mapaniupil ya.
Ing kapaniupilan king kaparang Mortal
Yang palatandanan ning taung animal;
Ume yang maniupil ampon makipagkal
King baneng iwalak makitid nang lugal,
karing ayapsal na akit meng manapsal,
karing asakal na akit meng manyakal
Ban ding kayang supil tunggen deng makamal
Leon ya king gubat, guinu yang matangal.
Karing bilungan ning libru ning Istoria:
Mika Darius ya ing Matuang Babilonia,
Mika Alexander ya ing Macedonia,
Mika Julio Cesar king Paganong Roma,
Mika Napoleon Bonapart king Francia,
Mika Adolph Hitler ya ing Alemania.
At aliwa muren nune dakal la pa
Ding linub miniupil kasiping dang bansa.
Agpang naman karing budning Pilosopo,
BAGUE yang MIMISIP matas ya talindo;
Pagnasan neng akit ing aslag ning aldo
Ban lakuan ne dulum ing Kweba nang Plato;
Inia makanian yang minisip matilo
Eya pepatugut king pamanimbento
King anggang paniulung a ngeni makalto
Ing PAMISIP naning tau yang pepalto.
Mika pamanyulung king parang ning syensya
Makapagmulala ne ing teknoloya;
Misusulapo ne ing tau king banua
Darasan na pati aliwang planeta;
Ing lijim ning dagat ene lijim kaya;
Ing bie na ning yatu atyu king gamat na.
Wari sa king libru na ning Pilosopya
Ikit ne ing sala, ala ne king Kweba.
Ngara naman detang magkas king reliyon
Ing tau eya mu pamisip at aksyon;
Atin yang kaladuang makipag-komunyon
King Matas a IBPAng babie inspirasyon.
Inia kabang bie na ing mal nang debosyon
Ing tajiran no ding bayung jenerasyon;
Makalaman karing kayang meditasyon
Ing katuparan na ning Banal nang Misyon.
Ding linto uliran: Moses ding Hebreo
Ing bait Bethlehem, Jesus Nazareno;
San Pablo,San Pedro, Helen, Constantino
Ing Madre Teresa, at Papa Juan Pablo;
Propeta Muhamad ding Muslim o Moro
Siddarta Gautama ning turung Budismo;
King India, Mahatma; king dayang Malayo,
Doctor Jose Rizal at Ninoy Aquino.
Nung pitutuliran ing gagkas ding biasa
Lalto king ing tau atlu ya persona;
Ing kapaniupilan inia gagawan na
Personang animal yang magbabo kaya.
Inia e patugut pasulung keng syensya,
Personang mimisip ya ing paganan na.
Nung inya ing tau lusuk at sakdal ya,
Persona yang Angjel ing tataid kaya.
Aku man, nung misan, animal ku naman
Ding para kung lasip buri kong supilan;
Ibat king anak ku yang akaugalian
Maki-pagtorneo kareng pasiknangan;
Ing pamagsane ku e makanian-kanian
King bakung maniambut karas ning labanan
Ing pulung-arena buri keng sakupan
Maguing aring leon, kampyon dang tangalan.
At nung misan naman metung kung makudta
Sisibul king isip ing malagung diwa;
Tipunan ko detang mapinung salita
Saka ko ilala at piakma-akma;
Potang mayari ne ing kanakung guewa,
Poesia yang lunto yampang karing malda;
At ing poesiang yan yang magsilbiing tanda
King atin minisip king mayubung paksa.
At nung misan naman tapat keng susuyu
Dimut kung kaguiwan king banal nang lagyu
At panamdamn ning mabilug kung pusu
Malapit ku Kaya, anak nakung bungsu;
Nung paten daku man king krus da ipaku
Ali ku pa-alian nung nanu ing tutu:
Atin Dios! Atin Dios! Ing Dios yang mituru
Baku lang palsintan ding kalupang bigu.
Nung misan, king ubud ning kapanamdaman
Mipagkal-pagkal la ding atlung sikanan;
Ing personang lasip manintun yang laman;
Ing personang angjel babawal na neman;
Ing personang anghel buri na mayap ngan;
Ing personang lasip liliku yang dalan.
Ing personang isip ya ing manimbangan
Potang manatul ya, pikamuan da ne man.
Ing tau nanu ya? Ibat king anak ku
Paki-intidian ke king pisni ding libru;
Pikutang-kutang ku nung ninu ta aku,
Pati siping bale pagugumasdan ku.
Dapot angga ngening pilak na ing buak ku
Menatili ya ring metung a misteryu .
Bugtung ya mo waring luruk-lurukan ku.
Ing tau nanu ya? NANU ya ing Tau.
*******************************
Nanan Me Yang Rosas
Poesiang pang-anak neng RBA
Nanan me yang Rosas nung ala yang suksuk
kabud naka magtal, eka rin masuksuk.
Nanan meng puntukan ing kekang salikap
nung ala yang laman, eka mekakalap.
Nanan meng puntalan yang mabungang dutung
nung eme ukiatan, ken kang masalilung.
Anak, ukiatan me ing kekang paninap
managtal kang bunga, katmuan meng salikap.
Nung atin mang dusa anti lang pagsubuk,
Nanan me yang Rosas nung ala yang suksuk.
**********************************
Nanan me yang Rosas nung ala yang suksuk
kabud naka magtal, eka rin masuksuk.
Nanan meng puntukan ing kekang salikap
nung ala yang laman, eka mekakalap.
Nanan meng puntalan yang mabungang dutung
nung eme ukiatan, ken kang masalilung.
Anak, ukiatan me ing kekang paninap
managtal kang bunga, katmuan meng salikap.
Nung atin mang dusa anti lang pagsubuk,
Nanan me yang Rosas nung ala yang suksuk.
**********************************
Me Piden Versos Nang Rizal
Me Piden Versos Nang Rizal
kepampangan neng Renato B. Alzadon
Apamitan yukung tigtigan keng lira
a mabang panaun pipi at balbal na;
ding luma nang litid eno babie nota
pati inspirasyon ning musa mipda na!
Nung pamilitan ke ding maguing ampang na
lubas la king diwa king leguan at ula;
nung 'tin man sagakgak pabalat lang bunga
pati na sambitan pikatsa lang dusa;
at ulina kase ning bie kung ulila
king tula o lungkut pata ku kaladua.
Kanitang minuna! Eku kalaraman!
Mupin, makaba nang aldo ing miralan,
taguring poeta ken da ku ausan
king pamakibasa't pamikaluguran.
Nung batyon ku ngeni, itang milabasan
bina nang maulap kening katandanan,
katulad na wari masayang kapiestan
nung nu ding sonatang malalam kalamnan
a peparamdam da detang manigtigan
ila nang mibukud king diwa melakuan.
Metung kung tanaman a bayu pang tubu
dane ning aslagan karin ku mebugtu,
karin nungnu ating amyam a masamyu
karin nungnu ing bie taguimpan yang mamu:
Era ka kalinguan O balen kung indu!
Karening dalit ku ilang mengituru
ding magkantang ayup king sanga magyuyu,
at itang lagusgus ning danum king pulu,
at ing byung ning dagat mame masalusu
king maliwalas nang aplayang katabnu.
Inyang mayintang pa ing kanakung diwa
tiniman ya kaku yang aldo masala
ing pali king salu mikal alang kabla
bulkan yang babasuk king aping mibugha,
Tinggap ku king lub ku ing maguing makudta
ban karing bersada kumit kung upaya
at itubud ke yang angin a saguiwa
king kabantugan mu, ban yang mamalita
karing balang suluk matning itumaila
ibat keti sulip anggang lipat biga.
Likuan ke ing kakung tibuan a balayan
lubas a miungle dutung king kakewan!
Ding mayubung kablas ding kakung kundiman
ila ding alina subli kapilan man.
King kapagnasan kung magbayu kabilian
miglakbe ku lipat kadayat-malatan
dapot ing bunga ning kamangmangan kung yan
kesa king kumit kung guintung kapalaran,
ing tinaid kaku king pampang kung disnan
paldas yang anino na ning kamatayan.
Detang matimyas kung panaguimpan king bie
talindo, pigagap, at sintang dalise
king balen kung maslag karin la migsale
lalam nang likupan niang banuang makule.
Pablasang ing kakung panamdam pata ne
eyu naku sana aduananan gale,
uling king busal ning desyertong matamle
karin la minagus dening pamibule,
inia ining diwa, metuyut king lumbe
kening kaladua kung king dusa mipase.
*********************************
kepampangan neng Renato B. Alzadon
Apamitan yukung tigtigan keng lira
a mabang panaun pipi at balbal na;
ding luma nang litid eno babie nota
pati inspirasyon ning musa mipda na!
Nung pamilitan ke ding maguing ampang na
lubas la king diwa king leguan at ula;
nung 'tin man sagakgak pabalat lang bunga
pati na sambitan pikatsa lang dusa;
at ulina kase ning bie kung ulila
king tula o lungkut pata ku kaladua.
Kanitang minuna! Eku kalaraman!
Mupin, makaba nang aldo ing miralan,
taguring poeta ken da ku ausan
king pamakibasa't pamikaluguran.
Nung batyon ku ngeni, itang milabasan
bina nang maulap kening katandanan,
katulad na wari masayang kapiestan
nung nu ding sonatang malalam kalamnan
a peparamdam da detang manigtigan
ila nang mibukud king diwa melakuan.
Metung kung tanaman a bayu pang tubu
dane ning aslagan karin ku mebugtu,
karin nungnu ating amyam a masamyu
karin nungnu ing bie taguimpan yang mamu:
Era ka kalinguan O balen kung indu!
Karening dalit ku ilang mengituru
ding magkantang ayup king sanga magyuyu,
at itang lagusgus ning danum king pulu,
at ing byung ning dagat mame masalusu
king maliwalas nang aplayang katabnu.
Inyang mayintang pa ing kanakung diwa
tiniman ya kaku yang aldo masala
ing pali king salu mikal alang kabla
bulkan yang babasuk king aping mibugha,
Tinggap ku king lub ku ing maguing makudta
ban karing bersada kumit kung upaya
at itubud ke yang angin a saguiwa
king kabantugan mu, ban yang mamalita
karing balang suluk matning itumaila
ibat keti sulip anggang lipat biga.
Likuan ke ing kakung tibuan a balayan
lubas a miungle dutung king kakewan!
Ding mayubung kablas ding kakung kundiman
ila ding alina subli kapilan man.
King kapagnasan kung magbayu kabilian
miglakbe ku lipat kadayat-malatan
dapot ing bunga ning kamangmangan kung yan
kesa king kumit kung guintung kapalaran,
ing tinaid kaku king pampang kung disnan
paldas yang anino na ning kamatayan.
Detang matimyas kung panaguimpan king bie
talindo, pigagap, at sintang dalise
king balen kung maslag karin la migsale
lalam nang likupan niang banuang makule.
Pablasang ing kakung panamdam pata ne
eyu naku sana aduananan gale,
uling king busal ning desyertong matamle
karin la minagus dening pamibule,
inia ining diwa, metuyut king lumbe
kening kaladua kung king dusa mipase.
*********************************
King Utang Ku keca
King Utang Ku keca
Neng: Renato B.Alzadon
Misan, ing Angel ning Guinu, dinatang ya
King kecaming baryu bebe ning aplaya,
Ding tau king baryu pepayaus nala,
Arap ning Bisitas…den, pinulung nala;
Magdala ya kanung paka-sakung pera.
Katmu yang bisitas karing daralana;
At ninuman bisang pera, den, kaya la,
Idala na ngan ing agyu nang idala.
“Mupin” ing digdag na ning Angel ning Guinu,
“Ding perang den ela pibandian ning tau;
Uling nanu pamang bague keting yatu
Bandi nangan ning Dios…inya ding pera yu
Nung gamitan yo man king tula ning lub yu,
Dapot magbalik la king minie kekayu;
‘nia nung ing dela mu apulu lang saku
Makanian la naman perang ibalik mu”.
“Ing Dios” nganing Angel “pagnasan nang tune
Ing akit nakayung misaplala king bie.
Inia ing pera mu dapat gamitan me
King ikasulung na ning kecang pagkabie.
Antimong tanaman, yan palabungan me…
Nung ustu ya lingap, gambul ampon sese,
Mayumu lang bunga ding keca na ibie
A peka galal na ning sikap mung binie”.
At kaibat, ing Angel, biklat nane kanian
Pasbul ning bisitas ning baryu kung beitan;
Makaba ing pila…niang akung mikutnan
“Apulu pung saku” ngacung tinambayan.
Apulu lang saku ding kacung pisanan
Lima pago kaili, lima pago wanan;
Aliko binili anggang eke disnan
Ing galut kung dampa libis ning palayan
Mibule-bule ku: nanu kaya ngeni
Ing sukat cung gawan karing perang deni?
Nanu tang negosyu keting yatung iti,
Ing garantisadung alang pangalugi.
Nung ali ka biasa king pamagmantini
Ding kecang pujunan kanan do ding bwitri;
At nung magbalik ku kening bie pulubi,
Paniatang ning Angel, nang sabian na niti?
Atmu na kasakit king metung a tau
Ing dimut a beluan king lakad ning yatu.
Akabyusan ke mu ing kanam a gradu
‘nia ala kung balu keng pamagnegosyu,
At mu naku kaina karas keng nomeru
Eko man abilang perang inuli ku,
Balu kung apulu la ring taliri cu
‘nia balu kung sabian apulu lang saku.
King kai-isip ku mipakde kung bigla
At apansinan ku malungkut kung kalma.
Oini, akung dili kening kacung dampa
Ala kung kasuyu king bie kung malugma.
At pablasa kaseng mangmang ku’t maluka
Balang tiliran ku, ali ko katugma.
Mecad ing tratu da ngeni manaliwa
Lalu na’t ing pera yanang magsalita.
Inia ban mitabi ing pamangulila
Yang apigampa ku ing saling pamilia.
Muna sinali kung malagung asawa
Pati na katuangan mekibayad kuna;
Sinali kung saken… mitunggalan kepa
Sinali kung bale…malualas ya mula,
At bayang milusuk ing kacung ligaya
Sinali kung anak, oita pin, adua la.
Pananese anak, eya gawang biru
Gumastus kang anti yang balding tutulu.
Paniali mong gatas…paniali mong baru.
Potang sakit lapa, makakarug salu
Ing singil ding doctor, makikipatlalu
King ketasan na ning bunduk Pinatubu...
Pablasang ing bie ra mal ya pa keng guintu,
Agyang mal ing singil bayaran mu rugu.
Kabang daragul la, daragul mu naman
Itang lalto gastus a emu alisyan.
At lalu na iniang maintun lang cabiasnan
Inigut lang pera king kaili at wanan.
At uling ala ping patad ing gastusan
Ding pera na ning Dios ikua rang megisan.
Agya sang kusing mu ala nang mitagan
Ban maguing kambil na ning bie kung menuban.
Nung kapilan naman ala nakung pera
Karing yapa datang ing Angel ning banua.
Bagting ning kampana ipamalita na
Arap ning bisistas…Angel manaya ya!
Kanian ku migising..mibangun king kama,
Ulining dine ku salikut ku sana.
Iniang kusutan ko ding kanakung mata,
Kacung apialas…maninap ku pala.
Iniang balikdan ke ing mutyang kebuklud
oita ketang kama maniaman ya tudtud.
O! tutu pin pala ‘tin kacu linugud
Ena anti iniang dili kung magbukud.
At iniang tando ku ikit ku no cabud
Detang aduang kotsi kilub na ning bakud
Ken ku apialas grasya nang binubud
King maluka kung bie ning Dios a malugud
Bisni ke ing kuartu ra ding kacung anac
Maniaman la tudtud…alang malit sindac.
O! era na takman pait na at salpac
Ning bie ning maluka nung nu ku tinalmac.
King mabanding yatu karing la misapuac
Nung nu ing kalayan maslag ya’t busilac
Keni, timawa lang guyapgap, lipacpac
King banua nang asul ‘niang aldo masaspac.
Ding adua kung anak, cabang lalon kula
Mebalag ining lua caring kacung mata.
Kacung apialas itang degulan na
Ning utang ku king Dios… king grasyang binie na.
“Dios ko” ngacu,”Dios ko, oren lawan mula
Ding binie mu kacung miguit pa keng pera.
Guinu, angga man king mapda ku inawa
Eku makabayad king utang ku keca.
**********************************
Neng: Renato B.Alzadon
Misan, ing Angel ning Guinu, dinatang ya
King kecaming baryu bebe ning aplaya,
Ding tau king baryu pepayaus nala,
Arap ning Bisitas…den, pinulung nala;
Magdala ya kanung paka-sakung pera.
Katmu yang bisitas karing daralana;
At ninuman bisang pera, den, kaya la,
Idala na ngan ing agyu nang idala.
“Mupin” ing digdag na ning Angel ning Guinu,
“Ding perang den ela pibandian ning tau;
Uling nanu pamang bague keting yatu
Bandi nangan ning Dios…inya ding pera yu
Nung gamitan yo man king tula ning lub yu,
Dapot magbalik la king minie kekayu;
‘nia nung ing dela mu apulu lang saku
Makanian la naman perang ibalik mu”.
“Ing Dios” nganing Angel “pagnasan nang tune
Ing akit nakayung misaplala king bie.
Inia ing pera mu dapat gamitan me
King ikasulung na ning kecang pagkabie.
Antimong tanaman, yan palabungan me…
Nung ustu ya lingap, gambul ampon sese,
Mayumu lang bunga ding keca na ibie
A peka galal na ning sikap mung binie”.
At kaibat, ing Angel, biklat nane kanian
Pasbul ning bisitas ning baryu kung beitan;
Makaba ing pila…niang akung mikutnan
“Apulu pung saku” ngacung tinambayan.
Apulu lang saku ding kacung pisanan
Lima pago kaili, lima pago wanan;
Aliko binili anggang eke disnan
Ing galut kung dampa libis ning palayan
Mibule-bule ku: nanu kaya ngeni
Ing sukat cung gawan karing perang deni?
Nanu tang negosyu keting yatung iti,
Ing garantisadung alang pangalugi.
Nung ali ka biasa king pamagmantini
Ding kecang pujunan kanan do ding bwitri;
At nung magbalik ku kening bie pulubi,
Paniatang ning Angel, nang sabian na niti?
Atmu na kasakit king metung a tau
Ing dimut a beluan king lakad ning yatu.
Akabyusan ke mu ing kanam a gradu
‘nia ala kung balu keng pamagnegosyu,
At mu naku kaina karas keng nomeru
Eko man abilang perang inuli ku,
Balu kung apulu la ring taliri cu
‘nia balu kung sabian apulu lang saku.
King kai-isip ku mipakde kung bigla
At apansinan ku malungkut kung kalma.
Oini, akung dili kening kacung dampa
Ala kung kasuyu king bie kung malugma.
At pablasa kaseng mangmang ku’t maluka
Balang tiliran ku, ali ko katugma.
Mecad ing tratu da ngeni manaliwa
Lalu na’t ing pera yanang magsalita.
Inia ban mitabi ing pamangulila
Yang apigampa ku ing saling pamilia.
Muna sinali kung malagung asawa
Pati na katuangan mekibayad kuna;
Sinali kung saken… mitunggalan kepa
Sinali kung bale…malualas ya mula,
At bayang milusuk ing kacung ligaya
Sinali kung anak, oita pin, adua la.
Pananese anak, eya gawang biru
Gumastus kang anti yang balding tutulu.
Paniali mong gatas…paniali mong baru.
Potang sakit lapa, makakarug salu
Ing singil ding doctor, makikipatlalu
King ketasan na ning bunduk Pinatubu...
Pablasang ing bie ra mal ya pa keng guintu,
Agyang mal ing singil bayaran mu rugu.
Kabang daragul la, daragul mu naman
Itang lalto gastus a emu alisyan.
At lalu na iniang maintun lang cabiasnan
Inigut lang pera king kaili at wanan.
At uling ala ping patad ing gastusan
Ding pera na ning Dios ikua rang megisan.
Agya sang kusing mu ala nang mitagan
Ban maguing kambil na ning bie kung menuban.
Nung kapilan naman ala nakung pera
Karing yapa datang ing Angel ning banua.
Bagting ning kampana ipamalita na
Arap ning bisistas…Angel manaya ya!
Kanian ku migising..mibangun king kama,
Ulining dine ku salikut ku sana.
Iniang kusutan ko ding kanakung mata,
Kacung apialas…maninap ku pala.
Iniang balikdan ke ing mutyang kebuklud
oita ketang kama maniaman ya tudtud.
O! tutu pin pala ‘tin kacu linugud
Ena anti iniang dili kung magbukud.
At iniang tando ku ikit ku no cabud
Detang aduang kotsi kilub na ning bakud
Ken ku apialas grasya nang binubud
King maluka kung bie ning Dios a malugud
Bisni ke ing kuartu ra ding kacung anac
Maniaman la tudtud…alang malit sindac.
O! era na takman pait na at salpac
Ning bie ning maluka nung nu ku tinalmac.
King mabanding yatu karing la misapuac
Nung nu ing kalayan maslag ya’t busilac
Keni, timawa lang guyapgap, lipacpac
King banua nang asul ‘niang aldo masaspac.
Ding adua kung anak, cabang lalon kula
Mebalag ining lua caring kacung mata.
Kacung apialas itang degulan na
Ning utang ku king Dios… king grasyang binie na.
“Dios ko” ngacu,”Dios ko, oren lawan mula
Ding binie mu kacung miguit pa keng pera.
Guinu, angga man king mapda ku inawa
Eku makabayad king utang ku keca.
**********************************
Lua Ning Pusu
Lua Ning Pusu
Neng: Renato B. Alzadon
Hagerstown Hall, University of Maryland, July 25, 1977
Batis na ning tula durungdungan ke mu!
Wili at tumaila abut abutan mu.
Bisa ku man saklu, agya sang ditak mu!
Dapot..., ala na pin lugalan king pusu!
Pablasang ing pusung king dusa kinatmu,
karaklut mang tula, ala neng apagyu.
Lalon kong maratna malagung sampaga.
Banglu rang tatakas, ala nang ulaga!
Paldas ing kule na kanaku ning banua,
plegarias kanaku ing anggang musika.
Pablasang ing pusung sadyang maligaya
sinugat neng mortal ning kalmang saliwa.
Ah! E ku na sana buring aganaka
ing aldo miralan a misna kasaya!
Uling ing sugat ning pusung mepiraya
maulit ne naman, mangaplas, dumaya,
at potang maglapo ya ing tutulung lua
ning paginakit ku king sawil a kalma!
Ali...! E ku dapat mika paginakit
king gulis ning palad numan anti pait;
uling king uli na karin ya mibait
ing kapaligaran...makule penandit;
dapot nanung sankan, bakit kaya, bakit...?
neng ume kung maili..., damdaman ku'yng sakit.
Ing kaligayan na ning kapaligiran
e ya bisang tanggap ing kapanamdman;
uling balang tulang kanakung tanggapan
babayaran nang lua ning pusung sugatan;
O' sinta! O' sinta! Nung nukarin ka man
salunan kung pusu, bakit e me ulwan?
Kening sablang iti ikang pepasari,
ikang minie sugat kening pusung sawi;
ing tulang binie mu ditak yang saguli,
O'bat libung dusa ing kakung panabli?
Sinta nuka karin...? Lon mu'yng kakung bili,
gagale ning kakung gagalgal a labi!
Bustan mung ing napun miwaglit ne pamu
ya ring ati na ku keni king marayu;
ban ing bayung yatu akit keng malagu,
bustan mung ilapat ke king kakung salu;
at panigapu kung itulut mung mamu
bustan meng mapulis ing lua na ning pusu.
********************************************8
Neng: Renato B. Alzadon
Hagerstown Hall, University of Maryland, July 25, 1977
Batis na ning tula durungdungan ke mu!
Wili at tumaila abut abutan mu.
Bisa ku man saklu, agya sang ditak mu!
Dapot..., ala na pin lugalan king pusu!
Pablasang ing pusung king dusa kinatmu,
karaklut mang tula, ala neng apagyu.
Lalon kong maratna malagung sampaga.
Banglu rang tatakas, ala nang ulaga!
Paldas ing kule na kanaku ning banua,
plegarias kanaku ing anggang musika.
Pablasang ing pusung sadyang maligaya
sinugat neng mortal ning kalmang saliwa.
Ah! E ku na sana buring aganaka
ing aldo miralan a misna kasaya!
Uling ing sugat ning pusung mepiraya
maulit ne naman, mangaplas, dumaya,
at potang maglapo ya ing tutulung lua
ning paginakit ku king sawil a kalma!
Ali...! E ku dapat mika paginakit
king gulis ning palad numan anti pait;
uling king uli na karin ya mibait
ing kapaligaran...makule penandit;
dapot nanung sankan, bakit kaya, bakit...?
neng ume kung maili..., damdaman ku'yng sakit.
Ing kaligayan na ning kapaligiran
e ya bisang tanggap ing kapanamdman;
uling balang tulang kanakung tanggapan
babayaran nang lua ning pusung sugatan;
O' sinta! O' sinta! Nung nukarin ka man
salunan kung pusu, bakit e me ulwan?
Kening sablang iti ikang pepasari,
ikang minie sugat kening pusung sawi;
ing tulang binie mu ditak yang saguli,
O'bat libung dusa ing kakung panabli?
Sinta nuka karin...? Lon mu'yng kakung bili,
gagale ning kakung gagalgal a labi!
Bustan mung ing napun miwaglit ne pamu
ya ring ati na ku keni king marayu;
ban ing bayung yatu akit keng malagu,
bustan mung ilapat ke king kakung salu;
at panigapu kung itulut mung mamu
bustan meng mapulis ing lua na ning pusu.
********************************************8
Subscribe to:
Posts (Atom)
