Bacasyun

Bacasyun
Neng Renato B. Alzadon
Baltimore, Md USA-- Summer Time 2007

Summer Time na naman..... miras ing panaun
na ning pamaglayag, at pamaglimayun;
samantalanan ye ing pamicatagun.....
Mica atin co sang masayang bacasyun.

Atmu na caniaman ing Bacasyunista
mamasyal ca queni, mamasyal ca queta,
e la sa sasawa ding quecayung mata
qng leguan ning yatu...... aguiang nu co munta.

Calagu ning yato...!Atmu ne calagu
qng panimanman da ding magbacasyun mu,
at pablasa caseng balu re ing tutu
ing pamagbacasyun .....pansamantala mu.

Ing bie queting yatu macanian ya uri
mengari tamu mung magbacasyun wari;
e tamu alisian.....datang ing saguli
qng ibatan tamu carin ta ngan muli.

Cabang queti tamu magbacasyun sana
ing leguan na ning bie apagmasdan ta ya,
uling ing mitacdang oras nung datang na
casayangnan ning bie lubas qng ligaya.

Ba't sayangan ta ya ing macuyad tang bie
qng pamipagcamua ampon pamipate...?
Ing pamangandiria sucat neng milele
qng ban yang matangal mayubung pamiugne....!

Cabang e mamaco ing pamangandiria
e ya naman maco ing pamipagcamua;
inia macanian yang anting masisira
ing bacasyun tamu babo ning masala.

Ya sanang magbabo caring pusu tamu
ing lugud a tune qng caparang tau
ban nung muli ta man .....ing asabi tamu
atin tang masayang bacasyun qng yatu...!

*****************************

Lalangan Te Ing Milabas

Lalangan Te Ing Milabas
Neng Renato B. Alzadon


Bina mung pagmumulalan nung ba't ding guintung alala
e mo alulan mo sana
quetang metung a garapa
ban canita capilan man e ra acuang dumayu pa,
uling ngamu, para queca,
ing milabas masampat ya,
calupa ra ding melacuan a bacas ta qng aplaya....!



Ya ring masampat la queca ding saguling cule rosas
ngamu, e matatdang bacas
ning pamipalsintang wagas
a pagnasan mung balicdan caring aldo na ning bucas......
Mequeni Diosa ding Musas
qng salu cung maliwalas
at quening saguling ini, lalangan te ing milabas....!



************************************

Ing Paslu at ing Canta

Ing Paslu at ing Canta
Metacmus qng poesiang
The Arrow and the Song neng
Henry Wadsworth Longfellow-RBA



Bignus que ing paslu qng calaganapan
ing inagpanan na, eque balung sabian,
quetang salusu nang mine qng catasan,
ding panimanman cu, ali re atuquian.


Banua lang linabas , qng biru ning tagcu,
miuman queng atagpuan ing bignus cung paslu
qng pun na ning dutung nung ya mitimu
e ya mepacli man o mibayu anyu.


Dinalit cung canta qng cayactanganan
nung nuya sinanlad, eque balung sabian
uling atin waring macapanimanman
qng lawiwi na ning metung a cundiman


At misan a aldo, alang pangabayu,.
ya at ya pa mu rin, mula anggang sepu,
cacu yang atagpuan ing cantang delit cu
qng ubud nang pusu ning caluguran cu.


**********************************

Abou

Abou
(Meapsi qng poesiang Abou Ben Adhem
neng James Henry Leigh Hunt-RBA)


Qng misan a bengi, qng cacung pagqueran
acalingatan que qng sinag ning bulan
ing antimong liriong mibucadcad leguan,
Angjel yang susulat qng librung guinintuan.



Mipmung cagalangan ngacung mengamanu:
" Marangal a dalo, nanung susulat mu?"
Minatna ya canuan at ngana canacu:
"Ing laguiu ra detang malugud qng Guinu."



"Mangutang nacu mo", ngacung quincas queya,
"ing cayang laguiu cu , macacabilang ya?"
"Pagcalungcutan cu", agad pequibat na,
"ing laguiu mu Abou, e ya macalista."



"Ali na pu bala, waman, ing laguiu cu,
e mibilang caring malugud qng Guinu;
yabe yu ne mu pu, nung pamayapan yu,
caretang malugud capara nang tau."



Angjel sinulat ya, at meco ya iti,
dapot , mibalic ya qng tutuquing bengi,
guinintuan nang libru , iniang lon que iti,
ing laguiu cung Abou, mumuna yang dili.


*****************************