Gumamela

Gumamela
Neng Renato B. Alzadon
2007


I.

Malare nang punlas-----
malare antimo yang pisngi ning banua
neng ta'ne magpaitas
yang aldo sisiro dane ning Alaya-----
qng tagle nang timias
pelalung ding batis apapagcantan na
cagum da ding coplas
ding maniale ayup babo ra ding sanga;
ding paga-pagaspas
mariposang sugui magnasa lang dumpa
ban sangap qng licas
a saguiwang samyu------samyu ning sampaga;
qng tagle nang bicas
macanian lang anting susucu-----sasamba
ding lira ding watas
a magpa-alipan qng tagle leguan na....!

II.

Menuling nang punlas....
wari sa queng danum, danum neng melabug
pablasang tinacas
ing cabayangnan nang gaglas qng panirug;
ding paga-pagaspas
budning mariposa, cabud na la limbug,
pati na tecladas
ding magcantang batis mipda na lindayug;
ding maniale denas
tajimic no ngeni----- calupa ding bantug
a macudtang watas,
qng parang ning rima, e na bisang talbug-----
uling itang timias
na ning Gumamela quinupas......tinabug
calupa ning cupas
a sinag ning aldo malapit nang lumbug.......!




**********************************

Ing Siwala

Ing Siwala
(Ning Kukulait King Ilang)
neng rba


Ketang pampang na ning ilug manaral at maminyag ya
ing taung e karaniwan a manulang amanuan da;
dapot inyang kutnan da ne nung ninu tang talaga ya
ngana king ing kukulait king ilang yang siwala na
at ngana king atin datang a miguit e palak kaya
nung wari sasadya ne mu ing dalan king panyatang na
at king kamalan ning datang e man sukat para kaya
ing kalagan no ding sintas da ding sapin ding bitis na.



At ngana pa ning Maminyag: " Ing datang a amanuan ku
Ya kabud ing makalako king kasalanan ning yatu,
nung king danum na ning ilug aku bininyag da kayu
Ya binyagan na nako man ketang Santo Espiritu;
inya bilang pamagsadya aduan kung sumisi kayu
ban e kayu magimg sukal a masilab maguing abu
at pablasang malulut ne ing panaun na ning tau
inya ing baug a dutung makutud yang siguradu."



At dakal lang meniwala karing amanu nang ginkas
anting metung a Propetang tiburan ning banuang matas,
king masid da ding menasa menibat ya king milabas
ya ing Propeta Elijang mamuklat king bayung landas;
dapot king pamanaral na yang malino nang pabatas
atin datang, at ing datang Ya pin ing Talapagligtas
pagnasan nang ding daramdam lubusan dang atalastas
king ing Pangakung Maniaklung datang Ya nanu man oras...!




King arapan da ding malda, milyari misan a aldo
ing panenayan dang datang ikit deng king pampang linto,
"Oini", ngana ning Maminyag, "oini na ing amanuan ko
Ya ing Kordero na ning Dios a king sala makalako."
Dinulung la king danuman, king awad ning Nazareno
bininyag ne ning Maminyag ing teguryan nang Kordero
at king akakit ding malda tinipa yang ibat babo
king anyu ning Patipati itang Espiritu Santo.




Kaibat ning tagku king ilug, e na binang miglambat pa
ing Maminyag sinukul de ding salang king panaral na,
kabang atyu king sukulan ya ing pakibalitan na
ing dapat nang pagmulalan ning Korderong amanuan na:
"ding bulag talu manakit ding pipi magsalita la
makalakad la ding lumpu pati mete bibyayan na."
King sulit nang aramdaman lubus yang sinalpantaya
ala nang aliwang datang a Kordero, Ya pin na Ya.



Kanyan ne lalung manaral ing Maminyag, king sukulan
ala yang tuknang mamaus pamanising kasalanan,
linto pin king yang siwala ning kukulait masikan
a manintun karing tupang melili king ka-ilangan;
dapot ding misukul kaya e ra buring daramdaman
itang bague panyabian na 'nya lalu deng pikasnukan
inya baneng manahimik king ukyan da, inyang misan,
itang buntuik nang mekutud yang inapag da king pinggan.



King mepalyaring iti ing balayan migsalbat ya
pablasang kapanwalan dang ing Maminyag Propeta ya,
at kabang pagmalunan de ding maldang malugud kaya
ing maplas nang kamatayan yang memale king pusu ra,
kanyan ne anting mipinpin ing pabatas na karela
king ing pangakung Maniaklung dinatang ne, Ya pin na Ya,
ding menasang mekaramdam king Minyabi menwala la
ing e'ra mu peniwalan itang mismung AMANUAN NA.



Inya ngana ning misulat, kamumulan ing AMANU
at king ulina ing sabla linto ngan at meguing atyu,
at iting Amanung Banal mikatawan ya pang tau
at layun yang meki-saut, meki-ugne, mekisulu
dapot agyang dinatang neng mekisalamuha mismu
makanyan man ali ne pa kilalanan man ning yatu,
numan anti ing guewa nang mangaragul a milagru
pete re pang makapaku at pilkaran e mu nanu.


Diwa:



(King maustang pamanyuri, ing kapaskuan makanyan ya
menibat ya king Pangakung Talapanatbus king sala
bayu ya datang ing aldo pamanyatang, mumuna ya
itang Talapamalita king aldo ning panyatang na,
malyaring maslag yang talang tando king awang ning banua
O atlu lang Aring Magong mangutang king beitan na,
O metung kayang Maminyag a sasabing Ya pin na Ya
ing amanuan ku kekayung daratang, at dinatang Ya.



Ngeni...., ing Taga-Kulait a ing Pasku dinatang ne
Ya na kabud y Santa Klaus a king dalan at mu kainge,
nung yang atyu king parada dakal lang taung manalbe
usa la mo ding kukulyut king sasaken nang karwahe,
yang piaglon da ding tau anti ya mong santung tune
at ing maligayang paskung amanuan na panwalan de,
dapot itang guintung diwa a ing AMANU ati' ne
ya ing anting makapampan a king suluk makalele.



Pasibayu mayayakit ing milyari king minuna
penwalan de ing Maminyag, ing Kordero sikwil daya
at nung atin man Santa Klaus a mamalitang Pasku na
aliwa ing MAMALITA ing dapat panwalan sana,
nune ing dapat tingiran ya itang babalita na
daratang ne ing Pangakung Bining manatbus king sala
ing panyatang ning AMANU makanyan yang makilala
at ing Paskung tune Pasku, Pasku ya ping maligaya...! )

Atlantic City
Neng Renato B. Alzadon
Baltimore--2007


Ding kasiping bale--- Y Elmer at Nancy---
maralas lang mame king Atlantic City;
agpang mo karela matas la diskarti
inya makanyan lang manyambut parati.



Pangaras keng sugal, nanu tang balu ku...?
Makanyan ya naman ining kayabe ku.
Ing balu kung pyalung yang "Rami" keng kantu
o kaya "Tres Syete" neng lame keng baryu.



Misan, king abluk da dening miyasawa,
king Atlantic City, mebisa keng minta.
sweldu lang pabulan ding kekaming dela
ban karing Casino paki-parapinta.



Busal ding makislap a pigawang batwin
million dollar jackpot kaku yang apansin,
king lub ku dinalan magkang swerti ke pin
inarapan ku ne itang slotch machine



Telan ku ne kanyan ing balamu kambyu
abit-abitan keng antimong mangambyu,
pakiramdaman ke ing kurug ning rolyu
antimong gitarang kakapkapan tonu.



Aba, nung misan pin turan ke taginting
balamu ustu ya panga-abit bagting,
kanyan no manabu maglagutuk tabling
dening perang pilak a matni kalaksing.



Indat damdaman ke ing matning kalantug
sasyo ya king tula ing salu kung kakdug,
ken ku na dagdagan ding kakung babaldug
magkang itang jackpot turan ke balugbug.



King pangalukluk ku, o'bat kelambatan
kabud nala mimin ding sweldung pabulan,
ining pangalambut ken ku na damdaman
megatpanapun na ali ke pa mengan.



Pintan keng abe ku nung nuya dinungut
ing sloth machine na tiktak ya king kaymut,
e binang miglambat ala neng a simut
detang panaya na mimin lang megigut.



Ing e ku pa buri 'nyang muli na kami
magbiba la king bus di Elmer at Nancy
ing roleta kanu ikwa re diskarti
puhunan dang dela sinambut lang tripli.



King pangasambut mi, ibat na kanita
e na ke tinuki karing miyasawa,
ing katuliran mi indat managkat la
pangaras keng sugal e ke rugu byasa.



Agpang mo karela maralas lang tutud
inya kareng hotel karin no matudtud,
nanu man sabyan da e ra ke aguyud
sapat ne ing misan mengalambut ke tud.



At misan a aldo kabud-abud na mu
dening miyasawa mamun lang dumayu
ketang kapatad nang Elmer king marayu
karin no pa kanu maki-sulut pa mu.



Kanyan mi abalu king dening myasawa
mesilu lang ustu king pamanyugal da
ing carelang bale misanla ya pala
e ra ne ayatbus, inia mesaklit ya..



Salamat king Ginu, e ke meyamuyut
karening myasawang king sugal meyuyut
at salamat ketang misan ke dinungut
king Atlantic City, e kami sinambut.


*******************************

Atin Yang Lua Ing Kakung Panyulat

Atin Yang Lua Ing Kakung Panyulat
neng: Renato B. Alzadon

Aduan mu kanakung dalitanan daka.....!
Balakung kikiak la ding kakung sonata.....?
E wari kanita,
inyang anak kata,
ding kanakung gale yayampang ko keka....?
Dapot sikwil mula....!
Nganu: Malungkut la
at babad la king lua ding kakung poesya....!


Panaun miglayag. Ing bie kayanakan
kambe neng kinusad----disan te ing ketuan.
E ku aintindian....!
Nanu ta ing sangkan....?
Ngening malabug no kening katandanan
karin mo pamitan
a buring damdaman
detang amanuan mung paldas kung kundiman...!


Lon mo ding mata ku. Maniabi kung tutu.
Sangkan ning lungkut ku ba mu nang abalu.
Taguimpan ku bigu....!
Tula ku ditak mu...!
Ikang ligaya ku. Dapot...., sikwil mumu
ing ipanigapu
ning malsintang pusu.....,
pati poesia ku kesaman mung lalu...!


Ing bie tang miralan, wari sa keng aklat,
maluat neng misimpan----- king baul mikabat...!
E ne sa mibuklat.....,
nung e mu ing sampat
ning pakisabi mung migale kung tapat-----
'nia oyan ing amlat
bilang kapakibat
nung baket 'tin yang lua ing kakung panyulat....!




**************************************

Ing Amanung Sisuan

Ing Amanung Sisuan
Neng Renato B. Alzadon
Baltimore-2007

Ing amanung sisuan,
ya itang tumaila ning metung a indu
cabang pasusuan ne ing bungsu nang anac qng daya nang salu;
ing tumailang ita a minlungan lambis, lugud , ampon camu
yang antimong bining mipunla, meragul, qng saguiwang pusu;
nuan la ding penganac a midalitanan dilang catutubu
atin lang matibe sandigan qng bie ra, nu la man painturu.


Ing amanung sisuan,
ya itang aral na ning metung a ibpa
cabang tatalnan ne qng metung nang gamat ing lande paluca;
ing aral a ita, yang maguing tuntunan ning sapni nang mutya
bayang mipanginlag qng cabiguan ning bie, at maroc a gawa;
nuan la ding penganac a mituruanan qng sariling salita
ila ding migmana qng lijim ning beluan, aral a daquila.


Ing amanung sisuan,
ya itang dalung na ning malsintang tapat
cabang ing mutya na sangcan nang e pansin ing cayang pagtapat;
ing dalung a ita, dalung yang manayun pamilapat-lapat,
qng panga-apse na, mula anggang sepu, ganap ya at sapat;
Nuan ca cayanacan, atin cang amanung agamit magtapat
amanu yang sisuan a sacdal qng leguan , at sacdal qng sampat.


Ing amanung sisuan,
ya itang aru na ning casuyung irug
cabang ing sinta na, maquilua ya mata, aplit nang tatabug;
ing arung malambis, ya ing magpalino qng bague melabug
qng bayang masaguip ing pamipalsintang mamit-amit lumbug;
nuan ca Capampangan atin cang salitang maslag pa queng bubug
a quecang agamit antimong birtud na ning quecang panirug.


Ing amanung sisuan,
ya itang poesiang gayuma qng lambis
cabang gagale ne ning suguing macudtang pangawilian bosis;
ing poesiang ita, yang wagang patutu qng e ya maumis
ing sucad at rima, a pamanang adle na ning pamigulis;
nuan ca Capampangan, atin cang poesiang meapsi qng wangis
ning pulsu ning tau, a ustu qng sucad, at ustu qng sunis.


Ing amanung sisuan,
ya itang gulisac qng busal ning pisac
cabang ing labanan mapaling mamapi at casindac-sindac;
ing gulisac aita, masias yang terminung leucanan salpac
mipariquil ya mu caring manalipan a dayung manyindac;
nuan ca capampangan atin cang salitang mataram a acdac
a quecang agamit caring mapanyupil a magnasang dalpac.



Ing amanung sisuan,
ya itang sambitan ning managulele
cabang ketang aun ing matibe lubid yugus deng malale;
ing sambitan aita, lugud yang dala ning caladuang miwale
dane na pa carin nitang alan'anggan nung nu ya maglacbe;
nuan ca Capampangan atin cang amanu qng saglit ning lumbe
a quecang agamit ban ing quecang lugud miuman meng ayapse.



Ing amanung sisuan,
ya itang siwalang minunang dimdam na
nitang bayung bait, a alus e paman mibuclat a mata;
Ing amanuang sisuan ya ing capamunan ning ume magpiac na
cabang sisitsit na ing banal nang lugud caretang lacuan na;
nung pitutuliran, yang amanuang sisuan, ing cabaldugan na,
qng bie na ning tau, mula ya at sepu---alpa ya't omega.


************************************************

Alun

Alun
Neng Renato B. Alzadon


Ketang balkonahe ning hotel, Virginia,
kanakung pigmasdan
ing datang ning alun
a mumuma ketang balas ning aplaya.
Balamu deng anak, mitatagalan la
ban agad deng dasnan
ing indung magmalun
a bina nang sabik karetang anak na.
Ken ke aganaka ing balen kung sinta,
Perla ning Aslagan,
makabang panaun
a makawale ku king sepupunan na.
King udyuk na mekad ning pamangulila,
milayi la naman
mangalating alun
a misasaglulung dinugang king lupa.
Ing alun e pala king pampang mamangga
tauli nang sadsaran
yang salung mamalun
ning bigung maglakbe mau king balyan na.


*****************************

A Las Flores De Heidelberg neng Rizal

A Las Flores De Heidelberg neng Rizal
Kepampanganan neng Renato B. Alzadon

Puntan yeng balen ku, sampagang dayuhan
a pepatubu ning maglakbe dinalan,
at lalam nang banuang asul ning likupan
at tatanud karing kakung pakamalan
pakisabi yu na karing kekong dasnan
pamanyalpantaya king labuad kung tibuan.



Sabian yu king ngening ing munag-sumala
busnian nong punlas yu king mumunang uma,
king pampang ning Neckar dimla man susuba
karin ya pa mu rin magmasid payapa
at ing gugunaman na ning kayang diwa
ya itang Tagsibul a e manaliwa.




Sabian yu king ngening mamu nang babandian
ning munag sumala yang banglu yung simpan,
layun magparayo king kapaligiran
malambing a sunis na ning kapalsintan
ini mang maglakbe agyang pabulung man
daralit yang kanta king amanung sisuan.




At ngening ing aldo aslag na mayatyat
king tuktuk Koenigsthul nung nu ne miyukyat,
minye kule ketang abak a milingat
at diwa king parang, kapuluan, at gubat,
pugue na king aldo balyan na sinikat
a king kaugtuan na malabab ya dangat.




Sabyan yu karela a nung makananu
king libis ning dalan inagtal na kayu
kabang ing magmasid lasak yang kastilyu
a king pampang Neckar aninu yang multu,
karin na ko tiklip king luma nang libru
ban karing bilungan manatili kayu.




Dalan yu bulaklak, sulung dalan yu ngan!
Kapalsintan karing kanakung palsintan
kapayapan karin king labuad kung tibuan
tepangan king sugui, king dilag kaniwan
at kaul karetang mutyang kayintangan
a makapalibut king lumang santungan.




Ing aplayang asul potang dasan yu ne
deni nang uma kung king punlas yu ike
a panilas kanyang angin a manene
iuma yo karing mal king kanakung bie
ban abitasa ra degulan nang tagle
karela lugud ku, panirug, at pugue.




Mekad miras kayu king balen kung sinta
a e man kinupas yang kule yung dala,
dapot ing banglu yu a kekong kaladua
e misalimuyak makapaulina
ning pangawale yu king tibuan yung bansa
a king kapilan man e na kalinguan pa.

***********************************