Kiririring!!!

Kiririring!!!
Neng Renato B. Alzadon


Kiririring!!! Hello...! Nino...? Rey Alzadon...? Aku pin ya.
Ninu ini? Ha! ha! ha! ha! Rosa Mia! Ika pala!
Ali raka abosesan---balaku aliwa ika---
Nuko! Dakal nala mu rin ding banuang e mikit kata!


Kelinguan dana ka ngamo, ay! kapamiru mu naman
Agyang nanu pang malyari ali raka akalinguan;
Ing mumunang sinta kanu agyang tumua kang menuban
Ya ing emu aiwaglit king diwa't kapanamdaman.


Komusta ing bie ku, ngamo? Lugud na ning Apung Guinu
Medyu masalese naman--- ena masyadung kalulu;
Mekapag-aral kung bagya at mitas kung bagya sueldu---
Neng makasobra kung ditak, padala ku kekatamu.


O' Ika komusta naka,ampon komusta ya naman
Itang pepakilala mu ken king New York, iniang misan...?
Nano.....??? Diborsyada naka? Rosa Mia, bakit naman?
Balaku sang atagpuan me ing kekang penaguimpanan.


Aha. Aha. Ustu ka pin. Makanian pin. Wa. Ustu ka.
Tutu yan. Kalokuan na ne, pepatangis na ka pala;
Sayang na pin ne, wa, sayang ! Dapat sana pin ikata
Ing miaptasan a pusu, O' kaligaya ta sana.


Emu na ku man asisian uling ibat pa king ibat
Balu mu namang king ika ing apalsintan kung tapat;
Dapot ing kapalaran ta talagang e milalapat
Uling aliwa pin aku ing taguimpan mung katapat.


Buri mu king mikit kata? O' wa, kapilan? Nukarin?
Bina kung kasasabikan ing makapikit kata pin.
Nano...? keng Sabado, ngamo, alas sinku. Chinese Cuisine!
King Baltimore Inner Harbor...? Restaurant na ning Ongpin...?


Kapamu na. Emo kaya masanting nung keni bale...?
Bamu no man akilala dening kakung katubale!!!
Kuma kang papil at lapis, ing lugal ku isulat me.
Eka mikakunung maus ---ing numeru ku balu me.


Wha! wha! wha! wha! Pasensya ka. Ining bungsu, gagaga ya!
Akung maningat kanini, Y ima na mamimipi ya!
Ala keng kasaup keni. Inia ing pamagpamilia
Babalikatan mi rugu--- ikeng aduang miyasawa!


Oreni pin ding bunga na ning pamiusigan ming Jen
Adua na la dening linto mangalikut ming sisesen-----
Hello.....! Hello.....! Beep..! Beep...! Beep! Beep! Hello...! Hello...! Ati ka ken...?
(If you want to make a phone call, please hang-up and dial again).

Ing Quecang Tetagan

Ing Quecang Tetagan
(Iron Will)
neng Renato B. Alzadon


Ing quecang tetagan
ala yu qng quimut, ala yu qng anyu
at ala yu naman
qng timan ding labing mapagbalatcayu;
atyu cabubuslan
ning atmu catatag a matibe pusu
a qng nanu paman
sigwada na ning bie, e agad susucu;
qng e mu cabalwan,
acu ing pupugue, acu ing duducu,
qng quecang sicanan
a miguit qng leon ning metung a pulu.


Ing quecang delanan
a landas na ning bie, landas yang masucsuc
landas yang minlungan
bitag at pasulung camandagan tusuc;
dapot macanian man
ali mu picabiang ing maldang pagsubuc
tinggap mung maniaman
gagampan mung calma a queca mitutuc;
guewa mung guyabnan
pamanialpantayang dalise at lusuc
ban acua meng dasnan
ing carurucan na ning matas mung bunduc.


Queca cu tengalan
qng ing tetagan na ning tau qng bie na
atiu maglayunan
qng cabubuslan na ning cayang caladua;
case, nung macanian,
ing nanu mang datang a e inamin na
ala yang carinan
qng capanamdaman ban manaliguat ya;
balang calungcutan
balang casaquitan ning pusung lalasa
atyu ya qng queinan
ning salung tatanggap qng late ning dusa.


Salamat capatad
qng pamandalo mung matimbang, matimid
cacu la miatad
ding talimjaga na ning bie palpitaquid;
iquit cong miladlad
ing licum mung beluan a cacung amasid
nung nu qng panlacad
agamit dong sulu ding palpitalabid;
O' taung mapalad
sacdal ca catibe a ena mipaid
qng cacung timalad
gamat ne ning angjel ing queca tataid.



*********************************
(Ipariquil que ing poesiang ini, qng cacaluguran
a maquibat qng laguiung Willie Dizon ning Virginia.)

Poeta, Nanu ya

Poeta, nanu ya...?
Renato B. Alzadon
August 19,2007


Poeta, nanu ya....?
Pinili ne ning Dios ibat qng samula
ban mangamanu ya
qng mangapalyari babo ning masala;
mipagcalam caya
itang cabiasnan a macapagmulala
ban maguing sulu ya
qng queralumduman ding manintun sala;
at caring poesia
ilang bibigcas ning guinintuan nang dila
ding babie ligaya
qng lagyu na nitang Banal a Siwala.



Poeta, nanu ya...?
ya ing mituburan a talapangabus
ban mitimawa ya
balen a magdusa qng pangabusabus,
tacut, ala caya,
picasaman de man detang alang tarus,
aguiang mipacu ya
bitis ampon gamat qng babo na ning cruz;
o' e bala caya,
nung ing cayang daya magisan ngan magus
munie yang ligaya
qng Banal nang Lagyu ning caya minutus.



Poeta, nanu ya...?
ya ing babie pugue qng yatang busilac
ban miculayan ya
qng timan ning aldo yang bucung bulaclac;,
o' palsintan naya
yang naturalesang mebinang mawalac
malagu ngan caya
ing ayactanganan ning cayang pamalac,
uling para caya,
ing naturalesa yang licuan nang tatac
iniang maglalang ya
ing Matas a Diwang Tanac da ding Tanac.


Poeta, nanu ya...?
o'bat nung lugud ya matas dili uri,
ibat qng pamilia,
angga qng sepu na ning tibuan nang laji?
Inya lawan mu ya,
ipagmasabal neng alang pamangimi
amanung sisuan na
at ing cultura ning quegisnan nang dai;
inia macanan ya,
ing cayang panamdam, panamdam yang budni
uling ing pusu na
pusu yang daquila, pusu yang bayani.




Case, nung macanian
ya ing bayani na ning naturalesa,
ning cayang balayan,
ning cayang amanu, ning cayang cultura;
at aliwa mu yan
siwala ne ning Dios..... ing Dios atyu caya-----
at acaquit ta yan
qng banal nang lugud qng cayang capara.....!
Balen cung sasamban......
acu, e mu cu sa ausan Poeta.........
qng cacung cababan,
e cu macabague qng dangalan aita.....!


*********************************