Atin Yang Lua Ing Punlas Ning Rosa

Neng Renato B. Alzadon, 2006
Baltimore, Maryland, U.S.A

Nandin, king kanakung pamaglinis bale
apansin kung dakal la ding bague-bague
e ku na kailangan. Nung nuku la kine
manyayang lang lugal. Dapat nong miyugse...!


Alimbawa namu ding atyu king kahun
a makasalansan a malating buntun.
Ing bague atyu ken kupas na at laun
king kekaba na ning miglakbe panaun.


Itang makalaman iniang syasatan ku,
lumang kagamitan ampon lumang libru.
Nanan ko pa reni...? Eno maka-usu.
E ku no kailangan. Atin namang bayu...!


Inia, makanian kung migmulang menakut
ban yugse ko reti king lugal king laut.
Ding bague pisawan karin do kukutkut
ban king lalam gabun mamin lang marunut...!


Ining tauling kahun, kabud tinimtim ke
dimdam keng mabayat karing kakung takde.
Pablasang balu ku king keni ke kine
ing malating libru ning kakung talambie.


Iniang ibuklat ke ing malating libru
mabie lapa detang letrang sinulat ku,
nung nula milimbag king mabie amanu
ding matning gulisak kilub ning salu ku...!


Karin, a nung nu ku pigisan siwalat
itang pamalsintang banal, wagas, tapat.
Ing era asabi ding labing mikabat,
king malating libru karin ku simbulat...!


King kabubusalan nitang librung ita
karin ke sininup ing punlas ning rosa.
King mingatbang bulung limbag la ding letra
pauli na ning lua ra ding kekang mata.



Rosa...! Rosa...! Rosa...! Ati ne na naman
king diwa, ing aldo na ning kapamunan.
Nung nu itang lua mu...., pinulis kung miuman
king punlas ning rosang binie mung bakalan.


Ing maputing punlas , nung e man saguiwa,
ya, at yapa mu rin, eya menaliwa;
ngening lalawan keng maratnang maratna
akakit ke itang lupa mung maki-lua..!


Ing malating libru piragli keng tiklip
ban keta ing napun kambe neng mituklip,
magkang mangaplas ya king kakung pamisip
ing gising paninap a e na melilip...!


Nanu tang gawan ku...? Yugse ku ne kaya
ing punlas ning rosang king lua mu mengasna...?
Kagum na ning libru nung nula mitala
ding pepabakal mung pamigaganaka...?


Nung ayugse ko ding lumang kasangkapan
at aliwang bague e ku na kailangan,
dapat mung ing punlas at librung simpanan---
luma na la mu rin---yugse nala naman...!


Dapot...ken mang palang pamaglinis bale,
ampon pamaglinis diwa't pamibule,
Kakung abitasang atin palang bague
mitanam king pusung..... e ku na ayugse....!

**************************