Aliguat Ning Laman

Aliguat Ning Laman
Neng Renato B. Alzadon
Marso-2007

Cayanacan na ning bengi---mapali cu panamdaman---
ing lisangan manaliguat qng mabilug cung calamnan,
qng pali na ning aliguat mibangun cu qng pagqueran
at qng balcun ning Palacio tinaglus cung menandauan;
adungdungan que ing sibul a megawang pipandiluan
nung nu ing cristal nang danum paquislapan ne ning bulan,
anti ya waring managcat ban tipa cu qng mulajan
at layun cung magtampiso qng danum nang pangayamnan.



Cabang lalon que ing sibul, oita, cabud-abud namu
inapsa re ding sampaga ing babaing atmu lagu,
penandit pa, quetang sibul dili-dili nang mandilu
e na balung pagmasdan cu ing pangayamnan nang anyu;
ing maimpis nang imalan inyang mebasa nang tutu
iquit cu ing upaya na ning mapanamun nang salu
at itang upayang ita yang buri cung apasucu
qng pali ning pamagnasang mitau qng cacung pusu.



Oita, yang dili qng sibul, nung misan pin, sumaca ya
at lucluc ya caring batung menibat qng Babilonia;
nung misan, lumacad neman, lapitan no ding sampaga
at saca no uman-uman detang maputing catleya;
nanan que man pagumasdan ing mabilug a anyu na
peca-malagu yang dili qng Israel at qng Juda,
aguiang ding anac nang Saulo a balita qng leguan da
e la tuclung calingquingan quening mandilu qng mula.



Udiuc na ning pamagnasang qng pusu cu misisinsin
pepa-aus que qng Tanud itang mandilu qng ardin,
at iniang cayarap cu ne iting maslag pa qng batuin
at lalon cu ing leguan nang pangaririan da deng jasmin,
ing camalan cu't caniuan silapo na ngan ning angin
sablang bague queting yatu antimo waring milinlin;
ing pamilugan nang bicas ya nang bucud cung a pansin
at ing mig-ari qng lub cu, pagbandi que, ngeni mu rin.





Queta pin cabengian aita, qng mabilug cung calamnan
migbabo yang menagumpe ing aliguat na ning laman;
calupa na nitang danum ning sibul nang pipandiluan,
Y Batsheba, ya ing sibul a penaplac cung lisangan;
ing samyu na ning Catleyang matula nang uman-uman
ya ing samyung asangap cu qng mabilug nang catawan,
at detang mapinung marmol a nung nuya migluclucan,
inaplus cung capinuan da caring puad nang pamilugan.



Oyan ya ing cacung lijim, ing lijim cung pecalijim
at ala cung pisabianan quening ljim cung malijim,
dapot qng misan a aldo pequisabian nacung lijim
at ngana qng milamanan ya, darala neng macalijim;
balu cu qng mabalu ya ing queyang pilijim-lijim
e ne malyaring isinup ban cabang-caba ilijim
inya qng ban mitacpan ya ing depatan cung palijim
ing marapat a paralan belangcas queng macalijim.



Pepa-aus que Y Urias, Y Joab pepaulian ne
sangcan cung maquibalita qng labanan qng marangle;
dapot quetang e na malit ing macalijim cung paque
ing yang gawan cung pangambil qng macalijim a bague;
caibat que pin acasabi inutus queng muli bale
ban queta ing asawa nang Y Batsheba, lapitan ne,
qng macanian a paralan nung ing atian na dagul ne
Y Batsheba asabi na qng Y Urias inulian ne.




Dapot, cabucasan nita, yang canacung abalitan
qng Y Urias e minuli qng sarili nang tucnangan;
e na atanggap qng lub na ing magjilig qng pagqueran
cabang ding casing-cawal na atilu qng caparangan;
uliniti, inagcat queng maquisulu qng apunan
layun pepainum queng alac ban micapali ya laman,
iniang lupa neng magilas canita que pepaulian
ban queta pin Y Batsheba, puntalan ne, at lapitan.



Ali, e minuli bale, talagang laus qng lub na
ing cayang pamaquirame caring abe na qng guera,
inia ginawa cung sulat cang Joab a jeneral na
at Y Urias ya ing mismu ing tiburan cung magdala,
e na balung ing calamnan ning sulat a darala na
ing maplas nang camatayan qng labanan na ning Rabba,
ipabili que y Urias qng arapan ning batalya
at caibat paingulutan de ban qng laban miragsa ya.



Milabas ing pilan aldo ing tubud na ning Jeneral
dinatang ya arapan cu at migsulit manga-utal
sinabi na qng mapilan caring matapat cung cawal
miragsa la qng lele na ning cuta ra ding capagcal;
cabud abalu cu iti, ing cacung daya mibucal
at ing mua cu abatas na ning tubud a menigalgal,
inia ban minawa cu lub sinabi nang memirapal
qng Y Urias cabilang ya caretang cawal a mibual.



Menangis ya Y Bathsheba qng cabislac nang mipase
iniang yuli deng iburul itang sugatan nang bangque,
acu ati cu siping nang manaru qng queang lumbe
e na balung acu mismu ing cang Urias pepapate,
pepaquit cu caring tau ing tapat cung mequirame
layun cung minie capurian qng tepangan na ning mete;
calabas ning pamagmalun, y Bathsheba, inuli que
ban qng caba ning panaun asawa queng matutunggue.



Ngening ala ne Y Urias mandilu cu qng ligaya
ati ne qng candungan cu ing marilag nang Catleya,
at caring panimanman cu lalung lingcas ing leguan na
pamilugan ya papaluan uli na ning darala na,
at ing darala nang iti uling balu cung cacu ya
bina cung casasabican ing aldo ning paniatang na;
potang lunto ne qng yatu princepe queng paquilala
magpiesta yang caragulan ing Israel at ing Juda.



Misan pa, qng balconaje, magmain cung timan-timan
ing nectar ning tagumpe cu mayumu queng sisimsiman,
pablasang ing cacung lijim e ne lunto capilan man
cambe neng metambun Urias qng malalam nang cutcutan;
cabang lalon que ing sibul qng busal da ding tanaman
lepitan na cu ning tanud, binie na ing cagalangan;
sinabi nang atin dalo, buri na cung paquiquitan
metung ya caring Propeta, at ing cayang laguiu Nathan.

Qng pamirungut ming Nathan, iti, ya ing pigsulit na:
"queta pung metung a lugal, atin aduang tau", ngana,
"ing metung calulu ya pu, ing metung atme cacualta,
ing macualta pu at mu ne caracal a sese tupa;
dapot ing taung calulu metung ya mu ing tupa na
caluguran ne pu iti ,mamangan ya qng palad na;
at misan pu ing mabandi mica atin yang bisita
inia mitubud yang ipus ban misadyang pamangan da."


"Aguiang dacal lang tupa nang malagu at bayung tubu
ala yang buring miyapag caring bisita nang dayu,
qng balang micapamangan--quetang quesiasan nang pusu--
ing tupa na ning calulu yang quinua nang pepalutu."
"Ninu ya ta ing taung yan?" Ngacung guincas micacasbu
"kamatayan ya ing dapat qng depat nang macalicu;
mamayad yang alang sala qng macatapat a ucdu!"
"Mal cung Ari", nganang Nathan. " ing taung yan, icayu pu!"


"Ing Dios, binie na quecayu upaya ampon pibandian,
dinan na cayu pa ning Dios nung quecayu culang pa yan,
qng queraclan ding babay qng sarili yung tucnangan
ba't ing asawa nang Urias ya pang quecong pag-imbutan;
at ila ding ginamit yu ding pataram ding calaban
inacdac yu la cang Urias bayang mate qng labanan;
ing catulid a parusa qng depatan yung macanian
agpang mo qng quecang atul, ing marapat, camatayan."


"Macanian man, ing Guinung Dios, pabustan na cayu pang mie,
ing anac yu cang Bathsheba, potang datang ne, yang mate;
ing pataram e ne lacuan ing quecong pibale-bale
layun dagul ing sigalut a gumapang mangulabe;
ing depatan yu cang Urias, ing asawa na, quinua ye,
daptan na naman quecayu ning mismung siping yung bale
depatan yung macalijim, ya daptan nang macalague,
ing mabilug a balayan, ausan ne pang manalbe."


Cabud cagulut nang Nathan, canita cu mengilabut
mengablad ing cacung laman qng dine cu ampon tacut;
uling cacung apialas, qng Dios, e macasalicut
ing depatan cung palijim lalam aun macacutcut;
at quetang penadit aita penamdaman cung mengutcut
qng mabilug cung calamnan ing caplas ampon ing quirut
angga qng mipasiclod cung menangis alang patugut
sisising alang patanat qng depat cung pasalicut.


"Dios co, ngacung miniambitan, " malunus co pu canacu
tau cung palpicasala ibat qng mipangagli cu,
bucud mumu, ica , Dios co, icang picasalanan cu
inia queca cu dudurup at maniawad pacalulu
bustan me sanang luminis dungisan a caladua cu
ing metung a bayung pusu ya sang ibie mu canacu,
Pagamuamu cu, Dios co, e me sa lalaco cacu
pabustan meng manatili , ing Banal a Espiritu."



"Dios co, baluan cung nung waman mi-ampang cung ain queca
e mabawas ining salang depat cu qng quecang mata;
at aguiang nanu man ain ing qng altar mu isampa
maliari mung a isacwil a payalan mung ulaga
dapot ing e mu agawang apisawili mu sana
ya ing tantung pamanisi ning metung a micasala
inia ulit-ulit Dios co, pagparalampu cu queca
ibie mung pamamatawad ......patawaran mu cu sana."



Aral:

Caluguran cung babasa qng "Aliguat na ning laman"
ing quecatamung istoria, quen taya pu pupututan,
ing aral nang babie niti nung buri ye pung isimpan
ya itang acaquit ning Dios yang dapat a macapampan;
inia, nanu ya man sana ing babalacan tang daptan
ganacan tang atin matang e tamu apaglijiman
calupa nang aring David, aguiang pecalijim ne man,
ali ne alijim qng Dios ing depat nang casalanan.


*********************************************************