Bini

Bini
rba-2007-09

Nung miras ing aldo bisa cang mamili
maguing acabangal pusu nung sacali,
palague cu, Bungsu, e ca magcamali
nung dinan meng pansin yang mayap a puli.

Den namung manasic bina lang pijican
nung nanung sucat dang tanam qng asican;
uling ing bini rang salbag qng pamunlan
ya mu ring tumubung pale rang pupulan.

Yan namung damulag quenu re pabuctut
quen waring macupad a maina at gutut?
ali, pabulug de queng mabilis quimut
masanting a bicas at masican gulyut.

Nung magpalaji cang manuc a panlaban
e me buring tatyo yang lajing talunan;
mecad ing buri mung maglaji na pin man
caretang ganarul, subuc qng tepangan.

Careng magpabini, quen na mung apalya,
insanu tang bunga ing dinan dang tanda...?
Ya nang pilinan da ing pecamacaba,
ing pecamasanting, ing pecamataba.


Pacatandanan me ing queca cu payul
nung nanu ing bini yang quecang apupul
nung bini yang mangga ing quitcut mung butul
mamunga yang mangga, e mamungang santul.

****************************