Ing Poesia, Oyan

Ing Poesia, Oyan
Neng RBA


Ing poesia, oyan,
Ya ing alang patnang paniatang ning abac,
Nung nu qng silangan,
Yapsa ne ning dulum yang aldo masaspac;
Ding batuin at bulan
A sulu ning bengi, mapda la at magpiac,
Layun deng panayan
Ing pamagbalic na ning miwale pisac;
Potang ing cabengian
Datang ne na naman, ding yata rang pilac
Ilang mipalcasan
qng leguan at ningning qng banuang mawalac;
ing poesiang yan,
ala yang camalian, ganap ya at tamac,
camamatutuanan,
Obra Maestra ne ning Tanac ding Tanac.


Ing Poesia, oyan,
Ya ing alan’anggang sirculu na ning bie,
Nung nu calacbangan
Atin mibabait, atin mamamate;
At balang cauran,
Atin casalising caleldo macule;
Gulut ning caqueuan,
Ati ne man carin ing berding marangle;
Yang bagyung masican,
Catumbalas ne ‘niang angin a manene;
Ing mamaping bulcan,
A nandin minyintang, ngeni, payapa ne;
Ing poesiang yan,
Inia minlungan ya qng mialiwang adle,
Uling yang caburian
Na nitang linalang qng Banal a Gale.


Ing poesia, oyan,
Ya ing pamituglung a atmu canayun,
Anti qng ngeninan
Mitutuglungan la ding bucas at napun;
Inia ding batisan
Tipa lang maquiagum qng dagat a susun;
Yang banuang catasan
Caulan ne ing yatu qng anyu ning ambun;
At yang aplaya man
Yang catipanan na ning casuyung alun;
Quilub ning pisamban
Pusu lang bicluran ning banal a culdun;
Ing poesiang yan
A calilicuman ning mayap a layun
Yang mabie larawan
Ning Macudtang Watas qng anggang panaun.



Ing poesia, oyan,
Ya ing tugma-tugmang mapinung sonata
Ning calaganapan
A maquipamintu qng sucad at rima;
E pagmumulalan
Ing macasunis dang galo ding planeta
At ing alan’anggan’
pamiatbanan na ning yatu at banua;
Nung pitutuliran,
Ing cabaldugan na ning naturalesa
Ya ing cawatasan
A ginale ning Dios iniang maglalang Ya;
Yan ya ing caustan
Ning Matas a Diwa, Ing Dios Poeta Ya;
Ing meto-lelangan
Poesia ne ning Dios, oyan ing poesia.


***********************************